Khristan tem reshikangshir BJP den NPF-i yariteper

Dimapur, April 1 (TYO) : Linük nung BJP lenisüba kübok Khristan tem reshikangshir saka NPF-i BJP den longjemer mapa inyaker, ta NPCC Tir-i sangdong ka nung metetdaktsü.
Küm ishika tejaklen bendanger osangbener kati L. K. Advani dang par sorkari kübok Khristan tem reshikangshir aser tanaben yimsü melendaktsür ta asüngdangba mapang, Advani-i ibaji tiyazü, kechiyong Khristan State Nagaland sorkar nung BJP Home Minister ka lir ta langzüa liasü, ta NPCC tirisa sangdong nung shia lir.
Iba dak sendakba nung Assam elections ajanga alima dang kuli sayutsü. UPA sorkar mapang Look East policy aser Nagaland state nem sen peria agütsü. Tang NDA-i Act East policy inyaker saka state nung sen mali, ta paisa shisem.
NPCC tirisa ashiba agi, “asenok ajaki arrtsü mangatettep timi angatettepnür aser ibaji anatsülen nungi mapa inyaktsüla. Ajisüaka, ajak dang tongtipangbaji Khristan tem, nübo agi tangar memenepertem aser Dalit nungertem reshikangshiba anentsüla.”