Khristan temi linük nung mepetmesü tensa aitsür

New Delhi, November 02 (Agencies): Hombar nü linük nung Khristan temi India nung tamangba lokti tsüngda tesempatep aser taremzüktep maliba tensa tamajungba akumba atema aitsüba den külemi, reservation policy agientsü atema merangba sentong tamajung aitsüogo.

“Tarendakba kecha makai onoki linük nung mepetmesü tensa tamajungba akumba aitsür. Onokisa, reservation policy agientsü atema merangba sentong tamajung aser linük Temzüng raksatsü merangba aitsür,” ta Khristan lenir nisung 100 dak temai sign asüba sangdong ka ajanga ashi.

Linük nung Dalit nüburtem, Adivasi tem, tetsürtem, tamangba lokti tilatem anema inyakba aser “ghar-wapsi” (Hindu nunger masübatem Hindu tamangba yimsü dangi meyipdaktsüba programme) anema tejashi nung Khristan lenir aikati iba sangdong nung sign süogo.

Iba sangdong nung sign asürtem rongnung St. Xavier’s College, Kolkata Principal, Fr. Felix Raj, taoba mapang Karnataka Police tongti, Francis Colaso aser taoba Delhi government Minority Commission züngsem John Dayal nunger densema liasü.

“Linük nung mepetmesü tensa anema ola adoker lokti balala, tamangba lokti balala, sobaliba balala, wadang balala nung alirtem, mongintem aser orientation tem den onok-a adener iba den külemi senso ajak dang, kari rara adokdaktsüba mera agiba ajak anema noktaktsü ayongzüker,” ta kasa sangdong ajanga ashi.