Khristanpur tepuokdaki yokba anema nisung aika longkak ait

Ranchi, September 28 (Agencies): Jharkhand state kübok yimtsüng ka nung tamangba yimsü melentsü asoshi sen agütsü, ta aija Khristanpur trok tepuokdaki yokba anema Khristanpur nisung 5,000 jungnüa adenshir yimdong nung longkak aita jaja.
“Parnok chiyoktsüla, kechiaser parnok dak tai mali, parnok sarasademtsü asoshi adenshia liasü,” ta Catholic lenir aser iba ‘silent protest’ ayongzüker Gladson Dungdung-i ashi.
Khristanpur trok pua aliba ya Pentecostal tem lir aser parnok ya Simdega district kübok Tukupani yimtsüng nungi lir, aser parnok ya taoba hopta bail nung agizüktsü memela. Yimtsüng ka nung aliba nüburtem Khristan dangi meyiptsü asoshi sen sübokrem agütsü, ta yimtsüng nung tekolakbai aitsüba sülen parnok ya apu.
Ketdangser tekolakpuri ashiba mepaidokteti parnok tepur pongu aser tetsür ka ya bail nung agizüktsü memela, ta Dungdung-i ashi. Saka iba ken o ya temaba court nung benoktsü, ta pai shisem.
August ita Jharkhand nung Hindu busemba sorkari tashiyim mesüra mesüzüka tamangba yimsü tanga dangi meyiptsü nokdangba ‘anti-conversion law’ renemba sülen temolung melemtep adoker, ta Simdega Bishop Vincent Barwa-i ashi.
“Iba ‘anti-conversion law’ ya nisung kar aser telok kar inyaksangshi mita reprangtsü asoshi oset ka ama amshitsü. Iba ajanga tarutsü nung Khristanpur tali tim atemtsü,” ta Dungdung-i shisem.
Madhya Pradesh nunga May ita nung tanur 72 Vacation Bible School camp nung adentsü asoshi anir aoba ajanga Khristanpur trok apu aser police temi item tanurtem ya Khristanpur, ta kuli agütsütsü memolungba ajanga tashiyim agi nisung apuba aser tashiyim agi tamangba yimsü melendaktsüba ken o nung ajemdaker Khristanpur nisung trok apu.
Iba ken o nung ajemdaker arishi küm 15 tain tebur ka juvenile detention center nung ita ka ayu.
Iba Bible camp nung adentsü asoshi tanurtem ya parnok Khristan tsüraburtem dang nungi temelaba agir ao, ta tanubusangi ashi.
“Ni police tem dang ni asodang nungi Khristan ka liasü aser onok VBS nung adentsü ao, ta ashi, saka parnoki ni ashiba mangai police station-i anir ao,” ta tanubusangi ashi.
Item tanurtem indang tsüraburtemi parnok tamangba yimsü melenshiba indang kuli ya temzüng nung aliba ama memetetdaktsü, anungji parnok ya Hindu nunger amai lir,” ta Police Superintendent Krishnaveni Desavatu-i ashi.