Khristantem reshikangshir telok anema Aor sannükertemi nokdaktsü

Dimapur, April 24 (TYO) : “Asen lima nung election merüka agitsü aser Yisu dak amangertem reshikangshiba asoshi mapang tajung ka agiteter sarasadem yinzü ka tenzüktsü aser aji kukua lumia sarasademba nung tembangtsü,” ta Aor Baptist sannükertemi telemtetba takang ka agiogo.
Parnokisa “Khristantem reshikangshiba telok nem vote magütsütsüla,” ta ajangajanga lemtetogo.
Iba telemtetba ya tan April 21 nungi 23 tashi Kümlong Baptist Arogo nung Ao Baptist Pastors’ Fellowship (ABPF) 20 buba senden amongdang lemteta liasü.
Kasa senden nungsa sannükertemi “Senso mesüra yimtsüng candidate shimer election-i yokba yimya aser inyakyim ya malitsüla, kechiaser ibai ajanga senso ka temeten arakmoka ayur, koba ajanga election merüka agitsü nokdanger,” ta telemtetba ka metetdaktsü.
Ano, sannükertemisa “Clean election omen ken ka mejema Ao arogotem ajak nung atentsü,” lemtetogo.
Item sentongtem ajak ya ABAM Clean Election Core Committee den yaritepa inyaktsü ta ABPF-isa metetdaktsü.
Ano, tanü India tesem balala nung Khristan reshikangshiba mapatem kanga ataloker asünungji, item mapaji anema Aor Baptist sannükertemi “India tesem balala nung Khristantem reshikangshiba anema India President dangi shidi ka zülutsü,” renemogo.
Iba ABPF 20 buba senden sentong April 21-23 tashi Kumlong Baptist Arogo (KBA) nung “Züngkümshidi” omen nung ajemdaker temoatsü tulu ngua katettsüsa Kumlong arogo aser arogo puri kanga dang mulungsoa tenla tulu agüja iba sentong anepaluba asoshi parnok ajak dang kanga pelar ta ABPF ketdangpurtemi metetdaktsüogo.
Ano, sentong nung Tsüngrem osang abenertem Rev. Dr. Wati Aier, Principal OTS, Rev. Dr. Mar Pongen, Principal CTC, Rev. Bendangmeren, Pastor KABA aser Rev. Maong Lemtur, Associate Pastor DABA parnok ajak dang kanga pelar ta ABPF ketdangpurtemisa metetdaktsü.