Khristantemi Bihar tzümetsüng nung timtemertem yarir

Patna, September 05 (Agencies): Khrista dak amanger tentet, Believers Church-i Bihar nung tzümetsüng agi kongshiba kibong 4,000 nem teyari agütsütsü lemtetogo, ta iba telok nung ketdangpur, K P Yohannan-i tanü metetdaktsü.
“Bihar nung district balala nung tzümetsüng agi kongshiba kibong 4,000 nem teyari balala agütsütsü atema onoki sen lakh 50 lemzüktsüogo,” ta pai sangdong ka ajanga ashi.
Ano Believers Church züngsemtemisa state nung tzümetsüng agi kanga mejungi kongshiba kibong 800 nem chiyundtsü den nüngdakba osettsüset balala lemtsüogo, ta Believers Church Bishop, Yohannan-isa metetdaktsü.
Pai ashiba agi, taoba ita mezüngbuba hopta nung par teloki Kishanganj, Araria, Katihar aser Purnia district tem nung relief camp yanglua sattu (lentil powder), chana grain (lentil), mojitzü, amtsük densema chiyungtsü tapu balala lemtsüogo.
Iba dak alia iba Arogo züngsemtemisa timtem agi kongshia alirtem atema ki yanglutsüba den külemi  tarpaulin aser tanga osettem angati lemtsüdar.
Maneni Believers Church-i district 6 nung kibong 3,200 atema teyari mapa inyaktsütsü lemtetogo, ta paisa ashi.
Iba mapang nung parnoki chiyungtsü takong, chana, mojitzü, shini, süngojok aser metzü den candle, matches, sapon ama nüngdak oset balala lemtsütsü, ta Believers Church Metropolitan Bishop-isa ashi.
Par telokisa tzümetsüng tesem nungi kibong kar kümzüka tejenokdak tesemtemi anir oa liasü, kong parnok nem chiyungtsü aser medical teyari agüja anepalu.
Bihar nung tzümetsüng ajanga timtembapur indang jembidang Kolkata Diocese Bishop Juria Bardhan-i, “Tzümetsüng agi kongshiba tesemtem nung nisungtemi, talisa tanurtemi timtem tulu ajurudar. Parnok nem chiyungtsü, tejenokdak, tzü aser medical teyari agüja yaritsüji asenok teinyaktsü mapa lir,” ta ashi.
Believers Church ya Khristan denomination ka lir aser par telok ya linük 10 nung züngsem million 2.6 dak tema lir.