Khristantemi Patanjali ‘holy Cross’ advertisement aitsür

Mumbai, August 16 (Agencies): Mongolbarnü Indian Christian Voice (ICV)-i Yoga tesayur, Baba Ramdev-i TV advertisement ka nung India nunger dang bendangertemi adokba osettsüset/chiyungtsü malitsü mepishidang holy Cross amshiba atema aitsüogo.
Baba Ramdev-i bendangertem oset malitsü ajungshibajibo Khristantemi pusemer, ajisüaka India nung Britisth nunger yimsüsüba temaitsü atema Temeshi Kangki amshibaji aitsür.
“Khristan tamang temaitsü, holy Cross amshibaji onoki sashia aitsür. Iba ya Baba Ramdev-i tamangba yimsü ka anema inyakba ama onoki bilemer. Iba advertisement ji tangsa anentsü onoki akhanger,” ta ICV Tir, Abraham Mathai-i osangbenertem dang ashi.
Iba ama mapa ajanga India nung Tenla kitem aser Khristan rejutem raksatsüba bulua akumtsü, ta Mathai-i ashi.
Paisa, iba tashishitsü aketba advertisement atema ICV-i Tir, Pranab Mukherjee, Ato kilonser, Narendra Modi aser tim ketdangsertem aser departments dangi shidi zülutsü, ta metetdaktsü.
Tang tasentiba advertisement nung India nüjiso mangudang indang noksa ‘black & white’ nung sayur, iba sülen ajungbena India map nung tesem balala nungi Kangki asem adoka sayur.
Item Kangki tsüngda ojang asem- E, I aser Co. sayur. Iba temaitsüji East India Company lir, koba ajanga British nungeri India yimsüsütsü lenmang lapoka liasü.
Mathai-isa, “Küm aika India nung tamangba yimsü balala nüburtem tesünep nung külemi lia aruogo. Tang tesüsa kari tamangba yimsü ka dang aliba linük ka kümdaktsütsü meranger,” ta ashi.