Khristantemi tepuokdaka Tsüngrem tenüng sanga külem

Simdega, December 06 (Agencies): Tiyazü ken o nung aitsüba sülen Jharkhand state nung aliba Simdega district nung tetsür ka shiranga aliba taneptsü anguba atema sarasademba nungi nokdanga arua police temi taochi mesayui merenshia ita junga tepuokdak yuaka Khistanpurtemi maneni sarasadem.
September 16 nung shiranger tetsür ka nem taneptsü agütsütsü asoshi Khristanpurtemi sarasademba mapang tribal Gondi yimdaklirtemi amak. Arasenba aser tashiyim agi temulung meyipdaktsür, ta bilemer yimdaklirtemi tamangertem dak züka merenshi. Iba tesem nung aliba police teyari ajanga parnok ya tepuokdak ita ka ayu aser police temi parnok dak taochi melii züka merenshi, ta osang ajanga ashi.
Police ketdangsertemi Sajan Majhi aser Kalender Majhi na dak kanga mejungi azük, ta bail nung tepuokdak nungi chiokba sülen Khristanpur Dasrath Karketta-i ashi.
Karketta ya Tsüngrem dak amanger ka lir aser pa ya cancer agi shiranga aliba nungi taneptsü angu. Pai pa indang taküm kuli lemsatepba ajanga Hindu nunger Bikhru Majhi süngmangdaktsü. Iba sülen tamangertem ya Bikhru kinungtsü Nitu Devi atema sarasademtsütsü asoshi kidangi jaok.
Parnok sarasademba mapang Khristanpur trok dak yimdaklirtemi züka merenshi aser parnoki Hindu yimsü mezüngmeshia tamangba yimsü tsütsü tsükchitep adokdaktsütsü ajungmesor, ta aitsü. Parnok ya tepuokdak ita ka lir bail nung chiok, saka tepuokdak tepela agi sünger Tsüngrem külema aser sarasadema liasü, ta Karketta-i ashi.
“Onok tepuokdak ita ka pelatepa ali – onoki ken aten, Laishiba azüng, sarasadem aser külemi tekülem mapang agi,” ta paisa shisem.
“Onoki district jail nung aliba tangartem den osang tajung lemsatep. Iba tesem nunga nisung aika Tsüngrem dangi aru. Onoki Tsüngrem aliba metet aser Pa mapa asoshi Pai onok amshiba meteta onok kanga pela liasü,” ta pai shisem.