Khristar Arogo aser LGBT

–  Wapangrenba Imchen

Okila : Na rong tulu ka nung mena lir ta yimdangjemdangang, tzüyim tiyong nung rongjuba mapang  mena alir kati pa mena alidak rong atem tip kelen tapok pereptsü tenzük nai pa dang aji oda meinyaktsü ashi saka nisungba jagi  nena prong kensa ticket alir iba rong nungji amen asünung nena prong kati ka nungdemtsü tenungdaktsü mali ta langzü. Pa temeten aliyongji nai kecha mashi odang toktsü nung tatsüka lir kelen rong jagi tzü senoka aittsü aser ajak samatsü masü no? Erwin W. Lutzer-i zuluba tatishitsü otsü tila kaji okila süa amer LGBT ya Khristar arogo asoshi putusen tebilemtsü onük rongnung ka süa ajuru nung iba indang jembitsü mapang  agi sayur ta bilema iba ocet zulur.
LGBT tetezü : Tatsüba nung Lesbian, Gay, Bisexual, Transgender dang LGBT ta amshir. Engraji nungi itemji yamai meyipzüker Lesbian-ji tetsür o tetsür na shi nung meimtepa meemba dang ajar, Gay-ji ajioda tebur o tebur na, Bisexual-ji nisung kati tetsür  aser tebur na prong den shi nung medemtsü jangrar aser medemer dang ajar aser Transgender-ji tetsüi asodang tetsür aso saka tetsür oset rangdoker tebur oset agi melenba aser tebur ama aliba, ajioda teburtema tebur oset  rangdoker tetsür oset agi melenba aser mama inoka tetsür ama alirtem dang ajar.
Kechiba LGBT indang jembitsüla ?
LGBT-tem yagi alima nung tanokshiba tzüsem tuluka bener aruba mapang ka kong TV, radio, aser osang kaket balala ajanga parnok asoshi temeten aser lokti sobaliba nung agizüka atongsemtsü asoshi aser par libaliroji nisunger tim liro yimya ka ama agizükang ta khanga  yirongba mapang ka nung iba indang angajema aser rajema alitsü atema jembitsüla. United Nation nung LBGT temeten asoshi pukumer linük 94, anemer 54 aser tetsüngda nung o shidang magütsüi aliba linük 46 lir. Arogo aika nung kasa atsüapong kiyimtsür adokdagi. Tali rajemtsü asoshi item mungdang kubok arogotemi melar; Anglican Church of Canada, Episcopal Church USA, Scottish Episcopal Church, Anglican Church in Aotearoa New Zealand and Polynesia, Evangelical Lutheran Church in Canada, Church of Denmark, United Protestant Church of France, Germany nung mungdang 18 tashi, Italy nung Waldensian Evangelical Church, Lutheran Evangelical Church, Church of Norway, Philippians nung Metropolitan Community Church of Quezon City, Metropolitan Community Church Makati, Metropolitan Community Church of Metro Baguio, Church of Sweden, Reformed Churches in Switzerland, United Reformed Church UK, Evangelical Lutheran Church in America, United Church of Christ, Canadian Unitarian Council, Unitarian Universalist Association, Metropolitan Community Church, Mennonite Church, Affirming Pentecostal Church International, Global Alliance of Affirming Apostolic Pentecostals, Swedenborgian Church of North America, Uniting Church in Australia, United Church of Canada, New Apostolic Church aser ano arogo tila aika lir.
Maneni LGBT temeten asoshi puküma nokdaker Arogo mungdangtem alima nung aika adokdagi Asia nungi 3 aser yangji India nungia Church of South India (CSI) dena lir, Africa nungi 2, North America nungi  49, Europe nungi 37, Central and South America nungi 11, Australia nungi  3, New Zeland nungi 10, Congregational Arogotem 46 tashi aser ano tanük tari  aika lir. Meilongi item mopungsem agi asen lima atongtsü hau Indian Penal Code 377 Chapter 36 ajanga kasa atsüapong medemba aija liaka iba indang parliament nung tatsütepba aser  social activist-temi maneni tsükshiba asenoki osang kakettem nung zünga arudagi. Aji asünung Aolima Khristar arogotem zangkhum süa alitsü aser amangba purtem iba indang rajema alitsü asoshi LGBT indang jembitsü mapang agi nungjener.
Laishibai kasa atsüapong medemba aser LBGT indang kechi ashir? : Laishiba nung iba indang züngteta dang shia lir saka kodang iba indang jembidir teti aitsüba asenoki angur. Nai tetsür den ama tebur den temedem; ibai tesempatsü lir. Tebur kari tebur den tetsür den ama medemra, tenaprunglai tesempatsü benshiogo; parnok zü pei dak alitsü. Teburi tebur den tamajung benshir…Tsüngrem yimli senmang mangutsü. Kechiyong parnok tetsürtemi yimya benshiba toktsür koba yimya masü aji benshi. Aser yamajisa teburtemia tetsür den yimya benshiba toktsür kati ka den jabujaritsü temulung nung jangrua teburtemi tebur den maksüba benshi aser parnoki pei dak pei tai tajangzük kechi angutsü tim aji angu (Levi 18:22; 20:13; I Korint 5:9-10; Rom 1:26-28).
Tsüngremi ali agi nisung tebur ka yanglu aser  pa teni nung takum tangula apuoktsü aser nisungji akumlir ka akum. Lir kelen Tsüngremi nisungji sümanga amua odaktsü aser pa dak nungi tesaret ka agiteta tetsür  ka yanglu, Tsüngremi Eva Adam nungi agiteta yanglu. Alipokdang nungi, pai parnok tetsür aser tebur yanglu. Iba atema teburi pei tebu aser tetsü toktsütsü, aser  pei kinungtsü den temulung toka alitsü, aser tenaprongla shi ka dang akumtsü; aji asünung tena joko ana masü, saka shi ka dang (Lipok 2:7; 2:21-22; Mark 10:6-8). Eden atsüki nung Tsüngremi tebur aser tetsür temang ka nung dang alibaji metemsüi angu nung tebur aser tetsür temang ka nungi  temang ana kuma piladaktsü, ajiasünung iba temang ana ka kuma lungjemtsü asoshi tejangraba nisung yimya nung keta aka. Metentsür iba o teratet jagi, tebur o tetsür na shi nung medemtsübaji dang atangji shidak ashi iba temekabang tema nung kechisa adoker ajakji shidak yimya masü saka tai. Tetsür-tebur shi nung medembaji mimchir alima nung aliba nükmen temolungka ta shitet, aji asünung  Laishiba tesayubaji ibai asüngteta merüka wajena ayutsübaji lir, aser yashi nungi tanü aser ano asüng alijak nung meimchir liyonga aotsübaji iba ya ajioda ya Tsüngremer sayang nung temeshi merajemtetba sayatenya. Kasa atsüapong medembaji Tsüngremer jungkai adokba o jagi memetentsür.
Khristar arogo telangzüyim
Khristar Arogo, ochi obendang agütsüba bangdak aser temeim sayuba akhumdong. Temenen mapa anema tongbang aser temenenpur dang meimtsü aser anidentsüji arogo, ibai kodak kikumbang. Tsüngremi alima oda meim nung pei ajaso chir temenen pur kumzüktsü alimai yok aser iba temeim kuli medangdangi yangdongsüji arogo asünung LGBT tem atema arogo o shidangji ozüng nung masü saka Khrista Yisu temeim nung amendaker agütsütsü tim. Mapa nung masü tamang nükrang nung, tzüzüng ozüng nungi masü tanela nükrang nungi Laishiba nung amendaker, telidak tensa, sobaliba aser takum ka tia jenjang nung rangloker Khristar arogo nokdaktsü tim. LBGT purtem atakatema, sensaja aser takum-shisa rangben reshikangshia masü Khristar arogo kotak kikumbang ama par asongba tzüchi nungi koda anitetsü ibaji shisadanga telangzüba agütsütsü nungdak.
Ao Arogotemi bilemdangtsü : Indian Penal Code Chapter XVI, section 377 nung nisunger yimya medemba alaka tangaji ozüng  anema aser tai ta shia liakasa, ano tebur nungi tetsür ajioda tetsür nungia ta melentsübo (Transgender) India nung  mela-a lir aser April 24, 2015 Right of Transgender Bill, Rajya Sabha nung yanglua agizüogo. Kanga dang anüla-a asen dangi tongpang ka meilungi arudagi, Ao Arogotem aser tamangertem saksalema renemer alittsü mapang ka nonngjendagi. Asen sobaliba nung tetsü-tebu nungi kasa atsü-apung medemba aser temang shilem oset melentepba (transgender) ajanga lokti, yimden yimli nung tebilemtsü kecha mengudang saka tanü asen den wara(trend) balaka arudagi. Par LBGT purtem sorkar temeen amer nungoka aitdang Article 371A asen den liakasa,  ozüngji ozüng agi metentsütsü aser aitsütsü asünung mita bilemdangtsü tongtibang ka lir.
Otembang : Timliro jenjang tebilemtsü onük aika tendak nung pokteta lir saka asen arogoi iba indang aiben aroka meshisadangi jajara nepeta item tebilemtsü jagi tsünger atanga aotsüsa timtembo majurukasa tipkelen tatutsü agüja mesademi jaja-a milungi lumitsü mapang tenjitsü tamakoktsü masü. Alima mapang agi ojang aser tsüngkum par tawa agi bener arurji koda asütsü ta bilema dang lira, ayak aser mapang repranga Khristar arogo Tsüngrem o nung amendaker tensa nung chichia takum liteta nokdaktsü khuret melira kimong tashi mait alitsü. Lesbian, Gay, Bisexual aser Transgender ner arogo nung malia ta dang bilemer asü? Item adianu ner arogo züngsem nung aliba metet nunga parnok koma na aser ner arogoi züngshitsü, jentoktsü asü? Ibala tebilemtsü agi ner arogobo kodanga mekongshitsü amai bilemer asü ?  Anüng kübok joko kechisarena ajak mopung  nung dang lir.