Khristar arogo nung tenzükertemi arogo koda anir ???

~ L. Kika Pongener.

Tanü putu nung Yisu Khrista dak amangertem tamang jenjang asadanga reprangdangra aika alima rongsen, alima tashitemetet aser alima tashi nem moksebdaktsüogo. Khristan-bo khristan-sa sernung tamangba yimya balala aika dang kümadokogo. Amanga amanga khristantem rongnungi mojing külemba arogo (Satanic Church) dena tenzüka aoba otsü angashir. Joko tamangertem rongnung ‘tebur o tebur’ na ‘tetsür o tetsür’ na ki ayimtsü atema arogo dang temelaba meshiba tensa tia kati menepdagi. Ano arogotemji reprangdangra arogo aika nung arogopur rongnung telemsa agi sunga lir. Tenyar Paul mapang nung Korint arogo nung telok telok lemsar liasu, anungji pai iba indang metongshija züluba asenoki mezüng Korint shiti nung angutsü, “Kechiyong nenok ano shi jenjang nungsa lir, kechiyong nenok rongnung tenukmerem aser rarabangsen alinung nenok shi jenjang nung alir masu no ? Kechiyong nenok kari “Ni Paul nubo” aser “Ni Apolo nubo” ta jembi tashi nungbo nenok ano shi nisung masu ama ? (1Korint-3:3-4). Atangji tanü arogo aika nung onok, parnok, ozü telok, par telok ta lemsar aliba angutsü. Aji oda, arogo jagiang alima loktiliba nung mepetmesu aser telemsa aliba ajungaji longjemdakja yanglutsütsüba sernung, meyiper arogo nungang mepetmesu aser telemsa alitsüsa akümbaji kangasa tesasatsü-ka lir.
Atangji tanü Khristar arogotem, talisa Naga nunger arogotem aika temai madok telung nung ‘Cancer’ tashitak agi shirangba ama yareta shirangdagi. Ano arogotem nung tamangertem mashileni aotsüsa tesayuba tapu tapu, koba shitak aser koba meshitak ta bendangtsü mekoki kümadokogo. Theological College balala nung Degree balala zünger arua arogotem nung toklang tenzüker aser sayutsüngirtemi Tsüngrem o sayutsüngiba nunga, Laishiba-bo laishiba nungisa sayur sernung tesayuba balala sayuba agi lai mashirtem tongmelang tamangertem karbo mangmanga alitsü akok. Ano tanü arogotem nung Tanela sempet balala amshir jenti adokogo, ashiko karibo Tsüngremi agütsüba Tanela sempet agi rongsen bushiba luyim amai pei tajangzük angulen amshia alitsüa akok. Ano arogotem nung rongsen ketdangsubaren reprangdangra arogo aika nung tenzükertemi kanga ochi mashi amshiba angutsü. Aji oda, Khristar arogo nung rongsen ketdangsuba ochi mashi amshira…!!! Tanga alima loktiliba nungbo koda asutsü…??? Anungji iba ama tebenja putu ka nung Khristar arogo nung tenzüker/tenzüklatemi zübazülema masu, saka kanga shisa kaa Tsüngrem o den medemdanga arogoji anitsüla. Atangji tanü Khristar arogo aika sorkar inyakyim, yimtsüng nung putu menden yimsusuba yayim aser alima loktiliba inyakyim den meyokteper, Khristar arogo ka alima yimten temzüng-ozüng, alima loktiliba temzüng-ozüng nem alendaktsüba aser iba tetuyuba sulen anidakba arogo aika nung angutsü. Arogo nung tongtipang nisung kar (VVIP), Full-time tenzüker tesashi kar, Deacon & Deaconist tesashi kar, yimso-yimlir/tata-tainer tesashi kar tsüngken tsübua parnok tetuyuba nung tashi anga-a anitakdang Tsüngremi mulungba aser laishiba tesayuba amai shitak meinyaktetba arogo aika angutsü. Atangji kangasa tesasatsü-ka, tanü arogotem nung tenzükertemi Tsüngremi mulungba kechi (?) Laishibai kechi melar (?) Tanela Temeshi tetuyuba kechi (?) ta masu…Saka alima yimten aser loktiliba temzüng ozüng tetuyuba, ibajiang Tsüngremi mulungba aser laishiba tesayuba dang nungi tongtipangba kümdaktsüba angudang kangasa sungmangseta repranger…!!! Atangji tanü Khristar arogotem atema tongpang rara tulutibaji Paul-i Efesa nunger dangi züluba ama, “Kechiaser asenoki azü aser shi anema memelangteper, saka tongtipangtem anema, aintem anema, iba ammang lima yimsusurtem anema aser anung tema nung tanela tamajung alibatem anema melangteper” (Efesa-6:12).
Anungji arogo nung tenzükertemi nisung tsüngken tsübua masu, saka Tsüngrem tsüngken tsübua tenzüktsüla. Tongtipangsa Tsüngrem tenzüker taküm ka tangari sungzü atsüshidang jokshishiba (Puppets) aser tangari button nung nemshi nungang arakzüba (Remote Control) taküm ka masutsüla. Asen tenzükba taa melemmelema angutsüba, asen taginuba nukjidong atongtsüba aser sademsadema tenzüktsüba atema masu, saka Khristar arogo ka laishibai sayuba ama anitsü nukjidong yur tenzüktsüla. Tsüngrem o-i ashir, “Kechiyong nisung mulung chidaktsütsü ni bushir asu (?) Mesura Tsüngrem mulung chidaktsütsü (?) Ni nisung peladaktsütsü meranger ama (?) Ni nisung peladaktsüra ni Khristar lar masu” (Galatia-1:10). Atangji Tsüngrem peladaktsütsü melena, telok kar mesura tongtipang nisung kar peladaktsütsü arishia tenzükra Tsüngrem tsüngdang khuret tulu asutsü. Arogo nung tenzüker-a suang, arogo nutsüng ka danga suang, shibai arogo nung mepetmesu aser telemsa adoktsüsa tashi amshidir, arogoji pei jurila meyong ama kibur küma atsüshidir, pa/la atemabo aiatai asutsü.
Tsüngrem o-i ashir, “Temettsüdaktsü adokdaktsütsüsa tatidangtem arulanglang, saka shiba ajanga itemji arudir, pa asoshi aiatai. Item tilatem rongnung ka danga shibai metsüdaktsüdir, pa asoshi temenungba lungpak ka tekong nung iloker tzüyim tarok nung pungokang jungla” (Luke-17:1-2). Atangji Khristar arogo nung pesaperong adokdaktsübaji mamanger limapurtem nungi masu, saka ashiko arogo nung tenzüker/tenzükla tajung, laishir lai poti meteter, mesura rongsen aser shisatsü agi arogo nungiter lenir tajung kar ajanga dang arutsüa akok…!!! Tsüngrem o-i ashir, “Shiri temang tepseter saka tanela takümbo tepsettsü makok parnok tetsübu; Saka shibai tanela aser temang anaprongla molumi nung samatsütsü akok pa-ang tsübuang” (Mathi-10:28). Atangji Khristar arogo nung ochi telemtetba magitettsüsa tenokdangba jenti ajurutsü akok, saka iba ama tensa tia ajak nungji tenzükertemi Tsüngremi mulungba kechi asutsü (?) Laishibai kechi melar (?) Tanela Temeshi tesayuba kechi (?) ta…iba nungji ajemdaker tasu-ita arogoji anira, arogo nung kodanga mepetmesu aser telemsa malitsü.