KHRISTIAN  YIMSÜ  NUNGI  SATAN  YIMSÜ DANGI

N. IMTATSÜNG IMCHEN

Naga nunger rongnung Ao kin dang Tsüngremi mezüngbuba Pa osang sangdongtsü khuret tulu agütsü. Khristian  yimsü  agizüker kümsük jenti renteta Tsüngremer kulisüba  tali tejangjaba nung aotsü atema asentenshi sentong Arogo ajak nung kümshia agir. Tanü tensa den apet mapang tajung nung  revival sayutsüngir tajung aika  adoka nisung  jenti pur  tanela nung jangrabangraba mapang ka, Khrista Yisu dak amanga teyanglur Tsüngremji dang Kibur kümdaktsür taküm ali tashi Pai sayuba lenmang nung jajatsü tenangzüktepba yur Yisu den, Yisu den mulungbena aotsü lemteta-doker aliba kin-ji Ao kin lir.Temeket nung aliba tangar kin dang Tsüngremer osang tajung sayutsü tejangraba tulu nung jembizüka ayubajia asen Ao kin-i nangzük.Missionary jenti alima kin balalai yoktsü telemtetba tajung agibaji Aor tongti ser teyanglur Tsüngrem tsüngdang azüngashia tenangzüktepba agia ayu.

1)  NANGZÜKBA  MEINYAKTET.

  Ao lima nung 1976 -1977 revival tulu adokba kuliji tesüngmangtsüka aser iba asentenshi mirok mi amai kanga sashia jangrua ayimsünga ao. Arogo ajak nung tanela temeshi tesemdangba tulu aser iba mapang asentenshi shidakba milak  arua nüburtem mulungjang nung semdangba mapang Ao lima ajaklen Tsüngremer yimji-yimjung talubusa liasü. Tenyartem kaket tapu ana nung koma tanela temeshi ajanga koda mapa tulu inyak, yamaji Ao Arogotem nung tangar oshi agi jembitepba jentipur tanela temeshi agi asüng! Amangba pur aika mulungjang nung kanga dang süoki ia tanela nung tzüra atem aser iba ya Tsüngrem taochi nung tanelar benjong tulu ka aküm. Iba mapang tanela temeshi dena amangba pur ajaki Kibuba tsüngdang tenangzükba tulu nung azüngashia tatemzükba jenti Tsüngrem den yanglu, saka iba tenangzükba shidakba menangzüktet nung pei chirnurtem mozü lar,Yi lar,rakzükraktemer, ashi-auer peisasa soseta asür aser alima raksar jenti adokogo.Atemzüker meinyak dang nungibo matemzük tajungba ta nemje-a kanga sasa bilemer. Tsürabur tajungtem nabo kangsa tajung saka nür chirnurtem koda asü ? Asenoki aibelena nangzük asü koda ?Chirnurtemi kodasür yamai alima nem teimtem bener arutsür ?. Kodang iba ya shisadangdir revival nung nangzükba raksaba,Tsüngrem jashidaktsüba ajanga lir. Khristabo agizük saka peisasa menaba tai menangzük,tangar taibo puteter, pei taibo kodanga meputeti miimbanga ayur. Tsürabur tajungtem jungjunga shisadangang nai Yisu Khrista junga menangzüktet nung kadasür kibong nung chirnurtem ajungtsü. Kibuba tsüngdang revival nung tenangzütepba raksadok nung temoatsü azükaru maka. Ao kin dang Tsüngremi ashir “Aiben nangzükbaji tongtipang masü,saka ‘nangzükba meraksai inyaktetbaji tongtipangba’.Yimsü dang agizük, saka Yisu Khristabo magizüktetba ajanga tanü Tsüngremer terasaba asenok den lir ta  metetdi.

 2) AROGOTEMI SEN DANG  JANGJAJANGJA METET. 

Ao Arogotem kümtem mumgdang atenshi dang senotsü koda tajungba nung tali tali renloka aotsü aji dang tesüngmangtsüka asalendong yanglur aser 5% /10% ta Ao arogotem ajak nung sarudener. Aiben mungdang mapang arogotem nungi sentep dang Aor temeshi yimti Impur lima nung adenshiaa  senotsü jenti lakh menden nung samaba indang Tsüngrem lartemi tepangkatsü ka jembitepba,shibai iba rongsen koleni ao ta bushiteper,saka tagirbo maka aser senbo mali ta tanü temeshi Impur lima tiaji lir. Item rongsenji arina, anarong dena Arogotem nungi amangba purtemi bendenba aser iba ya nüktsü tenla, Arogotem nungi,saka itemji tenzükertemi mapayur.Arogotem nung toklang tenzükertem tenzükba taa (Salary) kanga tajung agutsür. Jilaa (town) arogotem nungbo tenzükertemji sokar ministertem amai dang jangratemtsüka. Ano yimtsüng Arogotem nunga kodaser ita sen tajungtiba nung agutsütsü iba sentongji dang aritepba yangluteper,kechiyong Tsüngrem tenzükertemi town Arogotem nung dang jangratema tenzükner aser bushir.

–          (Maneni asung adok nung…)