Khristmas ajanga shisakadi

Tebu Tsüngremi Yisu Khrista alimai yokba ya alima kümzüktsü asoshi yok. Laishiba nung Tsüngremi alima kanga meim nung ta shia aliba tetezüji Tsüngremi nisung ajak meimba agi Yihuda nunger mesüra Yihuda nunger masüba bendangertem dang kümzüktsü ta masü saka nisung ajak kümzüktsü asoshi Yisu Khrista alimai aru. Tsüngremi alima yanglur tanü tashi nung alima nung alirtem asoshi temeim tulutiba sayubaji Pa chir Yisu Khrista alimai yokba ya asütsü. Ibaji asenok ajak asoshi osang tajungji lir. Anungji, shirnoki Tsüngrem temeim indangbo angashi saka magizük aser mamang parnokji shisamaka asütsü. Laishiba nung mezüng Khristmas amongba otsütem reprangdangra, Khristmas amongertem ajak rongnung anüdoklen alir shisatakartemisa tajungba amongba asenoki angur. Item shisatakartemji anüng nung ita petinu arakzükba lenmang aser tetezü metetba tashitemetetertem liasü. Alima  rongsen nunga parnokji takar nsungtem liasü ta parnoki  Yisu nem agütsüba sempet ajanga meteter. Yihuda nungertemi dang masü saka item tashitemeteter aser shisataka nisungtem, shirnok bendangertem liasü, parnok ajaki kenü anogo alima meimchirtem timtem nungi anitettsü asoshi Tsüngrem chir alima chuba kümer arutsü tabo meteta liasü. Ajisüaka, Tsüngrem chir chuba kümer arubaji Yihuda nungertemi mangu, mangashi aser memetet dang oagi talang nung alir bendangertemiang tama angu aser metet. Yisubo Bethlehem nung aso saka Bethlehem nungertemia Yisu soa alidak petinu tesangwa yaloktsübaji mangu kechiyong parnok dak Tsüngrem taochi aser temeim sentsüwangshi yalokba mangutsüsa parnok tanüla tenük pokdoker liasü. Ashiko, tanüa asenok aika Yihuda nungertemi parnok yimtak Yisu Khrista asoba memetetba amaji Tsüngremibo asenok moatsür ser nung asenoki iba temoatsü aser taochiji mereprangteti alitsüa akok. Atangji, Yisu asoba tesem Bethlehem tashi petinui tashitemetettertem anir aruba petinuji asenoki aonung anüng nung anguba petinu ya masü saka kotak tenyar liasü. Iba kasa aonung alima asoshi kümtetdakba asoba osang tajung sangoktsüba yimyaji sannükertem asoshibo shitakba tereprangtsü aser ola nunga  kotak tenyartem liasü saka tashitemetetertem asoshibo petinu liasü. Iba kotak tenyar jagi tashitemetettertem shirnok molungjang nung Tsüngrem tsübuba shisatsü liasü, parnokji bushia orr parnok dak tama Tsüngrem taochi yaloktsü. Iba taochi jagi tashitemetetertemi Tsüngrem nungi yokba chuba ka soa lir ta angatet aser iba chubaji bushia külemtsü mulungtet. Tashitemetetertemibo Yisu külemtsü asoshi alima talang nungi sempet dena renema bener aru saka alima chuba Herod-ibo Pa tepsettsü dang bushi. Tashitemetetertemibo alima nung kümtetdakba soa alibaji petinu tesangwa ajanga metet saka alima chuba Herod-ibo petinua mangu, kotak tenyartemi atenba kena mangashi. Pa mulungjang nung teti tejashi aser tangar dak temulung melemtetba agi sünga liasü. Ibayongji, kodang pai alima nung chuba asütsü tanur ka soa lir ta angashi, iba jagi pa mulung tipmetemdaktsü. Pa mulungjang nungbo Yisu tepsettsü bilem saka pai tangar dangbo paia alima kümtetdakba chubaji külemtsü ta ashi. Pa mulungjang majungbaji iba amaji liasü. Tanüa asenok aika Herod chuba amaji lir. Asenoka asen alidak, asen kidang mesüra asen lokti nungbo chuba amai asütsüa akok. Anungji, asenoki shinga ashia manger aser shinga daka temulung malemer. Alima nung shisamakaba nisungji yamaji lir. Shinga ashia mangaba aser ajak dak temulung malemba nisung tenük agi Tsüngrem taochi angutsü tasak. Iba jagi kotak tenyar agi akümba petinuji Herod-ibo mangu saka tashitemetetertemibo angu. Asenoki anüng aser alima nung Tsüngremi yangluba kechisarina indang junga mebushiba aser memetetba agi Tsüngrem sentong memeteter aser mangur.Asenokji shisamakartem lir. Ajisüaka, kodang asenoki Tsüngremi yangluba tesüngmangtsü mapatem aser item nükjidongtem indang bilemdanga bushidir, idangji asenok tanüla tenük aser shisatsü lapoktsü aser asenok tashitemetet nung aientsü. Tashitemetetertem aniba petinuji tanüa asenok jakdang lir saka asenok shisa aka nung dang iba petinuji angutsü aser iba jagi asen len anitsü. Iba Khristmas nungbo iba petinuji angutsü sarasadema mongdi.