Khristmas: Asen Aor Khristantemi koda angatet?

~ Tia Jamir, Mokokchung Town.

Khristantem asoshi Khristmas benjung ya koma tongtibang rasaa ashitsü tenüngdaktsü madoker. Kechiba Khristmas amunger (???) ta tanü asenoki kanga junga khen shisadangtsü kanga nüngdaker. Iba ocet nung tangar ajak toktsür asen Aor khristantemi tanü Khristmas koda mezüpelanger iba indang shisadangba onük ka züluner.
Tanü asen Aor Khristantemi khristmas nüng atemer inyaksangshiba maparentem angudang, atangji iba ya Khristmas dak aketba no(?) ta kanga rataseta bilemer. Item ya koda :
1. Khristmas benjung tenüng nung bomb/crackers tem poktepba ya atangji Khrista tesayuba no ? Koba lai tekong, tapu nung Yisu asodang bomb/crackers-tem poktepa pelatepba zülua ali? Khristmas benjung ya item bomb/crackers tem apokdang tantsür tambur, shirang manemertem okrongsetdaktsüba mapang mesüdaktsüli ta Khristan tajungtemibo angatetdi. Tsüraburtemia pei chirnur dang iba yimya ya asen tamangba yimsü denbo meputep ako ta tangatetba shisatsü apuoktsütsü kanga nüngdaka lir.
2. Khristmas nüngtem lottery mesüra sen züintsü atema inyaksangshiba ya onsara meputep ato. Taoba hopta ka shi tejaklen Mokokchung nungi Amguri len lenmang nung gari nung nüngdak kar atema jaja liasü. Len tom nung Arogo ka nungi lanur telok kati Khristmas nüngtem ‘fund Raising’-a ta gari soiter Bookmark tapak kaka agütsür donation meshia ajuru. Ano arogotem nungsa petinu yanglur sen jenjang atakteter donation meshia ibaji lemja jajar. Yamala Khristmas nüngtem rakzükraktemba yimya ya joko okshia indoktsü Aor Khristantemi kanga junga angatettsüla. Khristmas benjung ya temeim sayuba, takari makar bilemtetba, tajung inyakba benjung ka dang südaktsü nungbo koda tajung. Khristmas nüngtem gari nung senzüsenpongertem nem chia ajemtsü agüjang goto; petinuji yanglur angati agütsütepang goto; Office, dokan mesüra business telok nungi Khristmas tenüng nung amokmerena donation meshiba benjung mesüdaktsüli goto. Arung Khristmas ya pei akaba tajungtiba agi lemsatepba benjung südi.
Yisu Khrista alimai koda ajemalua aru yamaji iba benjung ya ajemalua temoatsü nung amungba benjung ka asütsü tsükdak-rongdaka temelenshitsü ajitetba onük kar zülur. Khristmas salem!