Khristmas Benjung Mongpu arur, asenok nisung Shiai iba khrista asoba Benjung ya kechi koda agizüktsü renemdar?

– R. Imkong Lkr, 4th Mile

Yangi tasüngdanga kar yamai agütsür. Yisu ya shiba? Pa ya kechi komala nisung aser koyimer? Koba lima nung pa aso? Pa ya alima kümtetdakba ta ajar. Alima sanger atema pa ya onsara teküpboktiba jenjang ka nung asu. Tsüngremi pa ajaso chir ka dang aliba alimai yokba ya kechi nükjidong nung yok ?
Yisu ya alima meyanglutangyongi liasü, pa ya tebu sentsüwangshiba amaji paa kasa sentsüwangshi nung kotak nung tebu den liasü. Iba alima sanger meimchirtem ya ka sülen ka ta jakzükyonga aruba temeshi laishiba ajanga jangja-jangja I.Putipuyang tapu ka nungi tadongi shia angutsü aser ano osangtajung Mathi tapu ka nung Abraham jabaso Dawid, pa jabaso Yisu Khrista jakzükdak kidong otsü ta shia angur. Asenok alima sanger otsü nungbo shiba nungi shiba jakzük tadongi ka sülen ka ta züngshia aru. Saka Yisu khrista yabo mezüng yongi tebu den kotak nung liasü. Saka pa ajanga alima temenen pur kümzüktsü asoshi alima sanger yima nung temeshitsür Mari ajanga alima shi kümer aso. Shidakba agibo Yisu atema tebu Yosef ya Ravir ka lir (step-father). Kechiyong Yisu ya tetsü nu-menden nung temeshi tanela ajanga among, aser takoksang Tsüngrem nungi lir. Aji oda Abraham nungi Yisu khrista asoba tashi nung putu 42 (lirana) bubai ayaoka aitang kümtetdakba Yisu Khrista ya alima nung aso. Mathi 1:17.
Yisu ya kanga ajemaluba aser tila akümba Tsüngrem chir agi nisung akümba liasü. Pa ya kotak tebu menden nungi alima menen pur kümzüktsü asoshi tebui yok. Yamaji pa Tsüngrem chir liaka nisung shi nung asu. Pa ya alima otsü nungbo Nazareth yimer liasü aser Bethlehem yim nung aso. Aser pa Tsüngrem mesüka liaka, Tsüngrem den saku alibaji sota ayutsü tim ta pasasa mezüngshi. Tetezü pa ya tebu Tsüngrem ama tashi tulu aketba, oda sentsüwangshi nung liakasa, pai aji khenyongi mezüngshi. Saka alima sanger temenen nung samaa aliba kümzüktsü asoshi pa taküm rangpen bendanga agütsür alimai aru. Filipi 2:6, 7, 8.
Yisu khrista alimai aruba nükjidongji tatsüba agi yamai rasaa ashitsü akok.
1. Iba lima nung sensaker tajemrepba tia nung alirtem mesotsü aru.
2. Iba lima timtem tekangshi talenba tia nung alirtem aniteta nüchi tia ngudaktsütsü aru.
3. Aser temenen nung samaa alirtem kümzüka kotaki anir atutsü atema aru.
Iba timtem, tekangshi lima nung ya sensaker, lajameret, lenimaor asoshibo masüang tajungba süla ta aikati bilemer aser shisadanger. Saka Tsüngrem nükjidong ka lir, ibaji kechi ta aikati bilemdanga alitsü südi, iba lima nung ya takar (rich-peoples) tulur, tashitemeteter agi sünga lir. Aser parnok ya tendangtsü asoshi sensakertem, lajameret-tem leni-maortem, mata-mapensartem ya yanglu ta metetangma. Ashi shibaibo timtema linütsü ?
Taküma 2016 Khristmas mongpu arur aser takartem, tulurtembo kechi chir kechiang machi nangdena bendena yur, kari talongtsü nung sentsüpranga sübuteper senzüteper. Kechiyong parnok kibongtem nung kecha tanüngtsü maka aser kanga sentsüwangshia liteter, saka ajiang, kar kibong nungbo taneb chi sorutsüa mali, oda abensüoshi alitsüjibo doktsür tebilemtsü agi sünger alidang, taochi makaba takartemi ita sen tera ngua aliba to Bank tashi arua kima tu ataa alir aser sentsüh tsüa aliba atema tu ita sen ajak okshia razüka bener aor aser ano tagütsütsü anünga aliba atema tu o tesüngmangtsüka shir oadoker. Saka tetsür tanurtembo tebu arutsü yongyaseta ataa aliba to ki atongdangbo teka tazüng ser tejak tu paklak-paklaka kümer ayatzüra nung lulaaa- kümer anarongdena pei ki tongteter, aser tanurtem, tetsü-i koda ta asüngdang da ng kecha ola madoki ajepzüka amener. Aser Khristmas amongtsüba to kecha ashitsüa mali teimla ajak samadoker alir. Yamaji item amala kibong asoshibo Khristmasji tejashi x-mas akümer. Saka tulur takartembo khristmas shijep tululu agütsüteper aser amtsük amsong (cake) tajungtiba tem-tu alia Khristma gift agütsüteper. Koda jangratemtsü. Saka item amala kibongtem nungji Yisu Khristaji mesoteter. Saka leni-maor kibong nungiang kümtetdakba Yisu Krhistaji sodaktsür. Halliluyah! Iba taküm otsü atema amangba pur ajaki pelatepdi arung.
Asenok ajaki ya rajema metettsü kanga nungdaker, oda amangba pur shiai pei-ji Khristan tajung kaka tabo tangar dang sayuner, saka mapa agibo mesayuteter. Kechiyong yangi ni takartem ajak ta mashir, saka aikati sensaker dang nungi sentem tali-tali agir aser Khristmas mongpu arua Khristmas atongdangbo kangasa jaksa-jaklema sayuteter, oda sensakertem dang temeim khen agi mesayui jangratema benjungtepba angudang onok tia makartem temulung kanga kuremdaktsür. Repranga ataa liang, kenü anogo iba tajangzük ya nai meyipa ngulanglang ta shia atar. Kechiyong temeshi Laishibai yamai ashi, Amos tapu 8:4,5-ya angang, o nenok mekokmeiner meyokertem aser linük nung sensakertem tamakok ngudaktsürtem. Efa tajemba aser jenjangbo tali kümdakja aser shekel tuluba kümdakja, aser seret teyazü agi külaka asenoki yoktettsü asoshi kodangang mendi ayoktsü ita tasen aser tsük ayoktsü asoshi amungnü sü-itema aotsü. Yamaji takar aikati sensakertemdang taochi temeim mesayui onoki sentem agitsü onok dak temeten lir ta ashir. Anungji asenok taküm ya medempangdangsa iba tetemlokji teyanglur nungi angutsü renema atatsüla. Oda tia maka, sensakpu tia ajurunungji jangpong tazüng aser aonsotsübo maka ta alidang temeimer kari jang 5 kg, kari 3 kg, kari 2 kg, kari metsü-mersü alitsü sen noklang ka, kari tenem ta agütsüba nungi ansotsü tera alia ayur, aser Tsüngrem tenüng sanga asüng atema tebilemtsü meli-i anisüngzüka mejanger. Aser tang ya Khristmas mongpu asünung aiür-asangurtemibo par tia-ki memetet-i donation meshiyonga arur, aser tetsüi anarongdena Khristmas tenla abentsü ta ser aonsotsü alidang tu sen metsü Rs.20/- anüngzüka yua akaba tu kechianga mashiji iba tu agiteta agütsür. saka tanü lanurtemi aji agi tenük masünger, kechianga meshika! Aser kazüyonga, tanurtem medemertem arur nem tu tzü-ang marok ka ka lema agütsür. kechiyong par-i amtsü amsang (cake) tu agütsünüaka par atema aji pungmang nunga mepongmangsemer aser süngo tanang jemdaktsütsübaji otsü mali akümer, anungji kanga aakseta oda tenük nungi nüktsü memeteti alua atar. Saka kodang Khristmas tu tonga arur, jang tera aliba tu surua yur anepdang chiyung dang aon mali-ji süngmok tu metsü ajena nangnanga chiyungteper senshir. Saka aonungbo totsü marok kaka yonger mejanger, aser ano Khristmas tendi nü to tetsüi chi mesüng mesünga soruteter aliba den tu mersü tajem tu ka ka amer metsü nung ajena khreb, khreb ta nguzüka asentsü alua chiyungteper. Saka iba Khristma benjung nung anema lia taküm tajung agi tongtetba atema pelateper. Ya koda jangratemtsü taküm aser ibajiang Khristmas shidakba ji lir. saka takartem, tulurtem aika shi tajung peria sua yur, iba denji mechiyungteter, kechiyong parnok temang agi memelar. Anungji pei kidang kechi aka, aji agi tenük sünger, Tsüngrem tenüng sanga lidi ni ta ajak dang ayongzüker. Amen.