Khristmas mapang yimjung atema sarasademdi; Tatok agütsütepdi

Kohima, December 12 (TYO): Naga nungeri küm aika yimjung aginüa arur aser asenoki asen state nung yimjung aser tesünep meshia sarsademtsü mapang tajungtibaji Khristmas mapang lir, ta Nagaland Chief Minister T. R. Zeliang-i ashi.
Taonung State Banquet Hall nung Legislators’ Pre-Christmas Service nung jembidang pai iba olen jembi.
“Asenoki wadang balala nung mapa inyakba lennirtem atema sarasademtsüdi. Asen Tsüngrem aser Kümtetdakba indang taochi ajanga parnok ajemaludakjang aser parnok nem shisatsü, tasütait aser tila akümba tangatetba agüjang ta sarasademtsüdi. Asen Naga loktiliba nung telok balala atema yimjung aser putepshitsü atemaa asenoki sarasademtsüdi” ta paisa shisem.
“Khristmas osang ajanga temelenshi bener arutsü aser alima indang khurettem koktettsü tashi lir ta ni amanger. Taküm Khristmas nung asenoki asen tajungtiba agi Yisu Khrista tenüng nung asen den anasatepa alirtem den dang masü saka ajak den tesentakteptem akangshidi” ta TR Zeliang-isa ayongzük.
Sentong nung Chief Secretary, Pankaj Kumar-i o jembidang, Khristmas ya Tulusang den tanüla ajanga lemsatepba mapang ka lir ta ashi.
“Khristmas mapang asenoki tatok agütsür aser tesüiba mapang mangatettep alibatem amadoker tesentaktep yanglushir. India sorkari ni mapa lemzüktsüba kümsük tembanga arur, anungji ni kü aibelentem atema tatok meshir aser ni kar danga jashidakja lira kü nem tatok agüjang ta mepishir” ta paisa ashi.
2017 küm tajung-tamajung aika ajangshia aruogo aser taküm küm tetenzüklen urban local bodies indang elections onük ajanga sorkar aser sensotem atema tensa tamajung bentsür aru. Iba tensaji elections songtemba ajanga dang süngjemdakja liasü, ta Pankaj-isa ashi.
Sorkari iba onük atema mapa aika inyakogo aser inyakdar aser ULBs timi ketdangsüa aotsü atema sendaktepa alir ajaki tangatetba tajung nung yariteptsüla, ta paisa shisem.
State sorkari inyaktsü ta nangzükba ama mungdang aser sentong balala ayonga mungogo aser 18 buba Hornbill Festival takok ngua amungdang domestic aser international tourists aika denogo. Maneni sorkari school education sector nung maparen metongshidar, ta Chief Secretary-isa shisem.
Iba sentong nung Angami Baptist Church Council Executive Director, Dr. Atsi Dolie-i Khristmas onük jembi aser iba mapang pai yimsüsürtem dang Tsüngremi nübortem asoshi inyaktsüba ama nenokia inyakang ta ayongzüka liasü.
Sentong nung mendenji State Chaplain Rev. Kuzierang Thou liasü aser Cherry Blossom School o The Angelic Choir temi shilem tajungtem agi.