Khristmas matongdang Mizoram sorkari telungpur den yimjung yanglur

Aizawl, December 17 (TYO) : Khristmas atongtsü anogo ishika ka dang lia Mizoram sorkari telungpur telok ka den ceasefire tenangzüktep agiogo.
Mizoram nung Khristmas aser Küm Tasen timtem melii sadoksadoka amungtsü atema iba tenangzüktep agi, ta Honibarnü Aizawl nung sorkar ketdangser kati ashi.
Manipur nung amenoka aliba Hmar People’s Convention-Democratic (HPC-D) telungpur teloki autonomous council meshiba atema Mizoram sorkari parnok den olemtep liyonga arur.
Hokolbarnü Aizawl nung Misoram sorkar aser HPC-D tsüngda yimjung olemtep tasembuba liasü aser iba mapang telungpurtemi AK-47 rifle 3, INSAS rifle 1, point 9 mm pistols 4, prangpong balala indang magazines 17 aser ammunition round 74 tashi agütsü. item prangpong-injangtemji HPC-D-i Mizoram police ket nungi rakzükbatem liasü.
Züngsem trok adenba HPC-D telokji working chairman LT Hmar lenisüba kübok liasü aser parnok rongnjung Manipur aser Mizoram nungi HPC-D lennirtem liasü. Külen Mizoram sorkar tenüng nungi additional secretary (home department) Lalbiakzama lenisüba kübok ketdangsertem aden.
“Nübortem Khristmas aser Küm Tasen benjungtem tiptema mungdaktsütsü atema onoki parnok den ‘temporary ceasefire agreement’ agiogo. Olemtep tasembubaji kanga junga tembangogo” ta Lalbiakzama-i osangbener dang ashi.
Mizoram sorkar aser HPC-D tsüngda yimjung olemtep mezüngbubaji August 10 nü aser October 5-6 nung tanabuba agia liasü.
Manipur den arrtsüa aliba tesem nung 1994 küm tentetba Sinlung Hill Development Council nem tashi talila agütsütsü atema onüktem lemsatepogo. Iba tesem nung Hmar nisungtem aika alir, ta Lalbiakzama-isa metetdaktsü.
HPC-D lennir LT Hmar-i senden amenba sülen ashiba agi, Hmar autonomous district council indang onükbo mebenok.
Manipur nung amenoka aliba Hmar telungpur teloki 1994 nungi autonomous district council ka agüjang ta takhangba agüja rarayonga arur. Parnoki meshiba telongtetji southern Manipur, northern Mizoram aser southern Assam kübok lir.
Taoba mapang Mizoram sorkari parnok den ita trok atema ceasefire agi aser ibaji July 31, 2013 nü tembanga liasü aser August 14, 2013 tashi olemtep agia liasü.
March 28, 2015 nü HPC-D telungpurtemi Zokhawthlang yimtsüng anasa MLA ka indang convoy amak aser iba mapang police asem kahset aser trok yirutsü.
Küm aika telungpur khuret agi timtema aruba sülen yimjung bener aruba atema 2000-01 nungi Centre sorkari Mizoram nem “Peace Bonus” ta ser sen crore 182.45 agütsür. Iba senotsü teyari anguba ya Mizoram dak alaka tanga state kati danga mangur.