Khristmas matongdang Naga yimten latetnür

Dimapur, November 5 (TYO): November 5, 2017 nü Chief Minister T.R. Zeliang den DAN Cabinet züngsemtemi Naga yimten tebilemtsü tekaratiba nung latettsü dak sendakba nung National Security Advisor, Ajeet Doval den ajurutepa senden ka amen.
Prime Minister Narendra Modi-i Naga yimten tebilemtsü atema tatembang telemtetba kja agitsü atema meranga inyakba atema senden nung T.R Zeliang-i metetdaktsü.
“Küm 70 tain Naga yimten tebilemtsü latettsü atema küm 20 tashi olemtepyonga arur aser North East nung telemtetba magitetba onük tulutibaji iba ya lir. Iba ken o asoshi telemtetba ka agiba ajanga northeast tesem nung yimjung arutsü aser talisa NSCN-IM den olemtep nung NNPG trokia shilem agibaji telemtetba ka agitsü mapang tajung lir. Talisa Nagaland nung assembly elections agitsü lir, anungji Naga yimten tebilemtsü ya elections magidangasa latet nung ajungtsü” ta Nagaland Chief minister-i National Security Advisor dang ashi.
Assam, Manipur aser Arunachal Pradesh nung BJP-i anir sorkartem lir aser iba ya Naga yimten tebilemtsü atema telemtetba ka agitsü mapang tajung lir. Talisa telemtetbaji Khristmas matongdangsa agi nung ajungtsü, ta paisa shisem.
Union Home Minister Rajnath Singh, Naga Peace Talks atema Interlocutor R N Ravi, aser Minister of State in DONER & PMO Dr Jitendra Singh nunger den jembiba onüktem Chief Minister aser pa den cabinet züngsemtemi Doval den lemsatep.
Minister Imkong Imchen-ia, Naga yimten tebilemtsü asoshi telemtetba ka agitsü atema state elections magi nung ajungtsü, ta tebilemba lemsatep.
Nagaland Chief Minister aser par cabinet züngsemtemi Naga yimten tebilemtsü tekaratiba nung latettsü nüngdakba lemsatepba atema Doval-i parnok dang pelaba metetdaktsü.
Khristmas matongdang telemtetba ka agitsü atema India sorkari kechi inyaktsüla ta National Security Advisor Doval-i tebilemba asüngdang aser paisa ashiba agi, telemtetba ka agira, ibaji mapa küma inyaktsü atema lokti aser yimten tensa tapet yanglutsüla.
State sorkari kechi junger ta shidir ibaji India sorkari agizüktsü. India sorkar aser Naga National groups tsüngda haihaura katepa telemtetba ka agitsü atema asenoki mapa inyaktsüla, ta Doval-isa ashi.
Yashi T.R. Zeliang den DAN Cabinet aser M.P. Neiphiu Rio nungertemi Union Minister of State (Independent Charge) for Development of North Eastern Region and MoS (Prime Minister’s Office), Dr Jitendra Singh den-a ajurutep.
Sendenji Nagaland House, New Delhi nung ayonga agi aser senden nung Secretary to Prime Minister, Bhaskar Khulbe, IAS aden.
Yashi nikongdang parnokisa NNPGs 6 indang Working Group den-a ajurutepa senden ka amen.
Iba senden nung Convener, Working Committee N. Kitovi Zhimomi aser Co- Convener tem – Zhopra Vero, Hozheto Chophy, V. Nagi, Kiumukam, Wangtin Naga ase Alezo Venuh, Envoy nungertem aden.