Khristmas matongdang Naga yimten latettsü imlar

Dimapur, December 8 (TYO): Naga nungeri küm 20 tashi yimjung maparen inyakba aser Framework Agreement sign süteper küm ana tashi kulisüa aruogo, ta Nagaland Chief Minister TR Zeliang-i ashi.
Centre aser NSCN(IM) tsüngda mapang talangka olemtep liyonga arur aser tang Naga Nationalist Political Groups 6-i India sorkar den yimjung olemtep tenzükogo, ta tanü Kisama nung Home Minister Rajnath Singh dang pai ashi.
Telungpur telok balala külemi sabang ka nung longjemdaktsübaji Tribal Hoho tem, tongti teloktem, Arogo, Civil society tem, NGOs aser NNPGs ajanga lir. Tang telok balala ajak ka küma longjemer Naga yimten latettsü merangba ajanga temulung anisüngzüker, ta TR Zeliang-i metetdaktsü.
“Tang ya Naga nunger aser India sorkar atema mapang tajung ka lir ta onoki bilemer. Küm 70 tashi Naga yimten tebilemtsü atema telatetba ka menguteti aruba angatetteptsüji tang ya mapang lir” ta paisa shisem.
“Putu 21 buba kanga dang kara ainer aser alima den külemi Naga nungertemia jajanür. Ajisüaka, iba pungmang aser alizüng ya yimjung ali nungdang tongtettsü. State sorkari Centre dang taruba State Assembly Elections matongdangsa Naga yimten latettsü mepishiba ama mapa inyaktsü mepishir” ta TR Zeliang-i Rajnath dang ashi.
Rajnath Singh meyipa aoba sülen TR Zeliang-i osangbener den jembidang ashiba agi, State sorkar aser Nagaland nung alirtemibo taruba state general elections matongdang Naga yimten latettsü imlar.
“Onokibo Khristmas matongdang Naga yimten latettsü akok ta imlar saka ibaji India sorkar aser Naga Yimten teloktem dak dang keta lir” ta paisa shisem.
Tang tagidak yimjung olemtep nung NSCN pur maden, anungji parnok medeni ajaki agizüktettsüsa telemtetba ka agitsü akok asü ta osangbenertemi asüngdang dang, “Onoki parnok (NSCN) dang Centre den ceasefire alitsü atema asüngdanger, onoki meranger aser parnoki yimjung maparen nung shilem agitsü ta imlar,” ta TR Zeliang-i langzü.