Khristmas mongpu jili osang sangdong aser Khristmas tetezü ratet indang tatsü agi lemsateper

~ R.Imkong Lkr, Diphupar, Dimapur

Mezüngpuba nung taochi ya kechi dang ajar aser iba taochi ya kong nungi aru? Tatsü agi angatet-tsü merangdi. Kodang alima nung temenen talenba agi mobanga sünga liasü, nisungtemi tepela, tesünep aser tekümzükba mekai teimla ajak samar liasü. “Full of disorder” Iba mang nung Tebo Tsüngremi mapang talangka jilia lia Isaia ainker aser Yohan baptisüba ajanga shingzüka doktsüba ama pa ajaso chir ka tang aliba alimai yok. Iba ajaso chir tenüngji tesüngmangtsü teshisadanger Tsüngrem tashi tulusang, teti tatem maka tebu yimjung chuba chir liasü. Yohan 3:16-17. Yisu kenü tanur ya Yirusalem yimti nung aliba Bethlehem yimti nung aso Mathi 2:1-2. Saka Yisu dang Nazaret nunger “yisu” ta aja, Mathi 2:23. Taochi ta ajabaji men-pur kümzüktsü asoshi yisu khrista alimai yokba ya lir.
Tanü asüng tanur asoba anogo nung nüburtemi “Birthday party” amongdaki sempet süoshi, Asayatsü osetem, aser chiyungtsü tajung bentsür aruagi chiyungtepa longsutepa amongba ya Yisu asodang tashi temetetertemi kinü tanur Yisu Nashi ki ka nung, Nashi tsük mejakba su ka nung sü agi aleper mejanga akaba semdanga pa külemtsü arudang senti oset hon, liangmesen aser teronem menemba totzü bener arua sempet agütsüba dak nungi ajizüka “reprangzüka” inyakba “copied” tanü tashi nüburtemi inyaka benshia arudagi. Mathi 2:11. Aser ano tanü asüng benjong mapang nung Yisu asoba anogo tonga arudang nüburtemi shijep tululu agütsütepa süoshi tajung sübuteper longsutepa mongteper, iba den külemi kibong shia, ki shia nung petinu süngdong “tedong” nung kanga prangshia yadaktsüba ya Yisu asodang pa asoba kilem kolak manung Atunütsük petinu tulu ka adoka kanga prangshia yaloktsüba dak ajizüka “reprangzüka “copied” inyakatepba ya temaitsü ka bilemteta inyakteperba tang lir. Mathi 2:10.
Khristmas mongpu mapang ya tanga mapang tang nungi khen agi balaka temenungratsüka alima ajonga nung mongteper. Iba khristmas mongpu ya khen bilemdangyonga ora khen agi tanga mongpu den medemdangtsü makokba alima ajonga nung kanga süngjema aliba angur. Khristmas mongpu ya mongpu rongnung tesüngmangtsü aketba mapang ka ta tanga tamangba yimsü amanger temia bilemdanger ta ashir. Saka tanga tamangba yimsü amanger temi par benjongbentsü mapang nung alima ajonga nung nüburtem külemi longjema mamonger. Saka Yisu asoba anogomung nungbo alima ajonga nung petinutem temenüngratsüka yaa nisungtem kanga pelatepa amongba ya angudang tanga tamangba yimsü amangertemi tenük kanga merema repranger. Yamaji khristanpurtemi amangba yimsü ya kanga renloka aoba angudang, iba yimsü anemaji nükmerema karibo mangayangtsü tasa atonga mapa tamajung khristanpur anema inyaker. Iba jagi tanü khristanpur alima nung liyonga aotsüba ya tasakba akümer ta reprangteter. saka asen tamangba yimsü yabo tenokdangba jenti liaka tajungba takokba nung maneni aotsü aser asen Tsüngremi len anitsü. Anungj iasenok pa dak amangbapurtemi tetsükdaktsü jenti ajuruaka temulung majemi pa dak tamang tulu yur temulung lema maneni Yisu sülen anidakdi ta khristanpur ajak dang ayongzüker. Amen.