Khristmas tenüng nung tatok agütsütepa tesentaktep yanglushidi: CM

December 13, 2015 nü state Banquet hall nung Chief Minister TR Zeliang den pa kinungtsü aser legislator  tem Khristmas jeli sentong nung agiba noksa angur. (Kohima, December 13)

Dimapur, December 13 (TYO): December 13, 2015 nü State Banquet Hall nung ‘Emmanuel’ omen nung ajemdaker Nagaland Legislators pre-Christmas sentong agi.
Iba sentong nung chief minister TR Zeliang-i Khristmas salem metetdaktsü aser pai ashiba agi, Khristmas ya sempet agütsütepba aser telok mesüra Arogo lokti chiyungtepba sentong ayonga agiba mapang ka lir.
Khristmas anogo nung Yisu Khrista iba alimai meimchir nem tatok agütsütsü aser temenen ajak alangzüktsü atema aru. Tsüngrem aser nisung tsüngda tesentaktep tasen ka yanglutsü atema Yisu alimai aru. Anungji taküm Khristmas nung asenok ajaki tatok agütsütepba aser tajung bilema tesentaktep tajungba yanglushitsü merangdi, ta TR Zeliang-isa ayongzük.
“Khristmas tsüngküm nungdang masü saka sangküm küm piyong asenoki külem meimchirtem dang temeim aser tajung sayudi” ta paisa ashi.
Iba sentong nung mendenji Amenba Yaden liasü, Mrs Mhalo T.M-i Lai zünga sarasadem, Pankaj Kumar CS Nagaland-i Khristmas salem metetdaktsü aser Rev Zhabu Terhuja-i Tsüngrem o jembi.
Sentong nungsa Rengma Baptist Church Choir Kohima, Toyang Chang aser James Basnnet band nungeri ken ajanga shilem agia liasü.