Khristmas ya yanglushiba aser asentenshi mapang lir : R Tohanba

Kohima, December 15 (TYO) : Mongulbarnü Kohima Municipal Council (KMC)-i Zonal Council Hall nung Khritmas jeli den Inter Ward Competition sentong ayongzüka agi.
Iba sentong ya “Let’s Go clean to get our globe clean” omen nung ajemdaker agi aser tongti tesemdangerji Municipal Affairs, Economic & Statistics Parliamentary Secretary, R Tohanba liasü.
Sentong nung Tohanba-i Khristmas aser Küm Tasen salem osang metetdaktsüdang, “Khristmas ya yanglushiba aser asentenshiba mapang ka lir” ta ashi.
Yisu Khristai alima nung temulung melemtep, tesempatep, nükmeremtep aser nisung tepsettepba ajunga madak yimjung bener aru. Khristmas ya achiajemba aser benjungtepba mapang ka dang masü saka asenoki tangar den Yisu Khrista indang temeim aser aria bilemtsüba lemsateptsüla, ta Tohanba-i ashi.
Paisa Kohima nung colony aser ward panchayat tem dang KMC den yaritepa Nagaland nung dang masü saka northeast ajunga nung jila temerüktiba kümdaktsütsü merangang ta ayongzük.
Tohanba-i Municipal Affairs Department-i mapa inyakba osangtem metetdaktsüdang, 2016 Kohima Smart City Project nung urban poor atema talidak yanglutsüba onük shisem.
Sentong nung Kohima Deputy Commissioner, Rovilatuo Mor-ia o jembidang, District Administration-i jila nung traffic timtem melidaktsütsü atema underground cables, colony tem asoshi sewage system aser ring road yanglutsü sentong lir ta metetdaktsü.
Sentong nung mendenji KMC Administrator Kovi Meyase liasü, Central Baptist Church Pastor Neichalie Chadi-i Lai zünga sarasadem aser Senior Sanitary Inspector, KMC, Neilhouphrelie-i anküp tepela o jembi.
Shilem balala nung takok angurtem aser senpet agütsüba:
Cleanest Colony Award Category – 1st : Old Ministers’ Hill (Rs. 50000), 2nd Bayavu (Rs. 30000), 3rd Officers’ Hill (Rs. 20000)
Cleanest Shop Award : 1st Café Caffeine Razhu Point (free registration for one year), 2nd Dzüvürü (free registration for six months) aser 3rd Mixed Bag, Jai Colony (free registration for 3 three months)