Khristmasji Putepdaktsüba Temaitsü

~ Rev I.Lanu Jamir,  Missionary.

1980 küm December ita Decision Magazine nung Dr Billy Grahami yamai zülua lir. “What does Christmas mean ?” Khristmas tetezü kechi ? Khristmas tetezü, ” Oji shi aküm aser asenok rongnung ali ” (Yohan 1:14). Khristmas tetezü, ” Immanuel arogo, ” ” Amang nung jajaba neburtemi tesangwa tulu ka nguogo” (Isaiah 9:2). Pai tasü aküm ayongküm ajanga asenok den jajatsü. Tetezü: “Asenok den Tsüngrem lir” (Mathi 1:23).
Asenok nisung shiai Khristmas tetezü tajangshiba balala ajanga ratettsü mesüra ashitsü akok. EL Bruce-i ashi, “Ni khristmas anogo nung Khrista ajuru (I met Christ at Christmas)”. 1992 küm oüu kibong Ramchandrapur, Orissa nung Khristmas among dang onoki mamangertema jaok. Khristmas nung arua adener rongnung Mr Hitla (Murgapat yimtsüng nungi ) E.L Bruce-i Khrista ajuruba ama, Hitla-ia pakümji Khristmas anogo nung Khrista ajuru. Khristmas anogo nung asor (born) iba alima nung nisung aika lir. Yamaji Khristmas anogo nung Khrista ajurur (tanela nung asor)aika lir… Tsüngrem tenüng sangdi…
Khristmasji putepdaktsuba temaitsü. Tongmelang agi asenoki khristmas tetezü , putepdaktsüba ta-a angateter. Lipok 3:8, 9 – nung Tsüngremi nisung bushi (God seeking man) ta zülua lir. Tsüngremi nisung dang ja-a ashi, Na kong al i? Tsüngremi meimchir temenen nung tsüka aliba bushibaji , tadok agütsütsü, putepdaktsütsü aser taküm agütsütsü (seeking to forgive, reconcile and to give life), (John 3:16).Yangi Khristmas temaitsüji bushibaji. Kechiba bushi? Meimchir temenen nung tsüka alibaji Tsüngrem den reconcile asü nung dang nisung O nisung naji puteptettsü…
Pa Yimchung Chuba Chir – Tsungrem aser nisung na tsüngda yimchung aka nung dang nisung aser nisung na tsüngda yimchungji katet. Aser ibaji Yisu shiba Khristmas anogo nung Bethlehem nung aso Pa ajanga reconcile asüba mapaji lir. Yangi temaitsüji, nisung nisung O nisung na putepdaktsütsü asoshi Yisui Tsungrem den reconcile südaktsüba mapaji lir.
Tatem Nung:
1. Rara aser tsükchitep maliba mapang dang yimchung ta ajatsü makok. Saka yimjung ya tapu 2 lir. Mezüngbuba – meimchir tsüngda nok-O-nü anendakja putepa kümdaktsüba. Tanabubaji – Tsüngremi tamanger ka temulungjang nung apuoktsüba tesünep jagi liteta sayuba ajanga adokdaktsüba yimchung. Khrista tesünep akar shiaji yimchung yanglur kaka lir (Yohan 20: 19,21).
2. Ne tembar kar dang na kanga kua jashia lir. Joko küm aika O mejembir. Pa/La denji meyipa tembar yanglushi mesüra reconcile asü nung koda ? 2015 küm Khristmas temaitsü na asoshi ibaji asütsü.
Bethlehem ta asüba Oji mejembiang Khristmas abensadaktsütsü makok. Yamaji putepdaktsüba (reconciliation) iba Oji mejembiang Khristmasji abensadaktsütsü makok. Christmas amongba aser Yisu iba alimai arubaji ibaji atalokdaktsütsü aru…Tsüngremi moajang.