Khulioh King telok 16 buba NSF final-i iogo

Dimapur, October 13 (TYO): Striker Nungsang Ao-i goal 5 tashi agütsüba yong par Khulioh King, Tuensang teloki goal 5-1 agi Pro-Streax, Dimapur telok madak tanabuba semifinal asaya koka tang tasayadak 16 buba NSF football asayamong final asayatsü jenjang tanü Mongolbar nü nguogo.
Tanü asaya tenzüker minute 20 buba nung T. Shellim Khiamniugan-i yanglutsüba cross ball agizüka Nungsang-i pa tekolak agi goal agüja par King telok temaba jenjang nung ajungkettsü.
Ajisüaka, Pro-Streax midfielder, Kito Aye-i par telok nem agütsüba goal meyiptsüba yong par telok anaprongla kasa jenjang aküm.
Ano, asaya tenzüker minute 62 buba nung par telok captain, Hemphing-i metsüba corner ball agizüka, Nungsang-isa par telok asoshi tanabuba goal agüja par King telok temaba jenjang nung ajungkettsü.
Pro-Streax asayar, Kito-i minute 66 buba nung iba goalji meyiptsütsü merang saka pai metsüba ball goalpost temaleni aoba yong iba alizüngji majangzüktettsüsa aküm.
Tesülen, asaya tenzüker minute 71, 87 aser 89 buba nung Nungsangi maneni tasembuba, pezübuba aser pungobuba goal agütsüba yong par King teloki tanü asayaji koka final nung shilem agitsü jenjang angu.
Tanü asaya nung goal 5 agütsübaji densema, Nungsang-i ajak agi goal 10 tashi agüja Pro-Streax asayar, Meren den kasa jenjang ngua, tan asayamong nung goal timba agütsür asayar kümogo.
NSF asayamong nung tan mezüngsüa shilem agiba telok, Khulioh King-i defending champions, Barack Football Club, Peren den tan October ita 15 nü final asayatsü.
“NSF final asaya nung Lajong FC Shillong nung Managing Director, Larcsing M Sawyan tongti tesemdanger aser Nagaland Paliamentary Secretary, Planning & Coordination & Evaluation, Neiba Kronu tetushi tesemdanger alitsü,” ta Organising Committee Convenor, Vipopal Kintso-i tanü sangdong ka ajanga metetdaktsüogo.