Khuret Aser Temoatsütem : T.Ken 68:19-27

“Kibuba shibai anogo shia asen khu abener, Pa temoatsüba” (t.19). Iba tekong ya asenoki yamaia meyiptsü akok, “Kibuba, shibai anogo shia asen khuret abener pa temoatsüba.” Asenoki khurettem aser temoatsütem shisadangdi. Tsüngremi asenok nem taküm nung khurettem agütsür. Kenken asenok sasa taküm nung khuret bena arur, anema abusoba, temenen menaba, mamangba, temeim makaba aser tajung mesayutetba ajanga. Saka Tsüngremi shimba lemang nung Pai mulungba ama jajara, aser asenok dangi khurettem arura, Pai asenok nem item khurettemji agütsür. Asenoki taküm nung khurettemji temoatsütem ama angatetdi.
Tatishitsü tulutibaji Tenyar Paul asütsü südi. Pa shi nung ayi agi koda timtemdaktsü! Pai asemben ibaji agientsü sarasadem. Agientsü melen Tsüngremi ibaji temoatsüang kümdaktsü. Pai Paul dang ashi, “Ni na nüngdakba taochi agütsütsü” (2Kor. 12:7-9). Kenken Tsüngremi mapa agienba ajanga sarasadem langzür. Kenken mapa tali bendenloktsüba ajanga sarasadem langzür. Yamaji Pai Paul dang inyak, aser khuretji temoatsü ka aküm.
“Saka,” nai ashir, “Ni khuret tulu lir. Ni iba nung kecha temoatsü mangur.” Anogo shia tekong 9 ji bilemtetang: “Kibuba shibai anogo shia asen khu abener, pa temoatsüba.” Asenoki mapang ka nung anogo ka dang alir. Ne taküm nung kechisa ajangshia aru bilemtetang. Nai kodanga ajanga moutettsü ta bilemba mapangtema ajanga aruogo. Saka iba ajanga Tsüngremi anir aru. “Anogo shia tanü onok nem chiyongtsü kua” (Matt. 6:11). “Aser, Kibuba, anogo shia onok khuret aser temoatsü agüjang.”
Asenoki koda ka bentettsü Tsüngremi meteta lir. Saka ne khurettemji tanga lemang ka lir. Tsüngremi itemji temoatsü agi melentsütsü akok. Pai ne nem khuret agüja lir asü? Ibaji Pai temoatsü balaka agi melentsütsü akok.