Ki 3 kakpoka tua auyar ka apu

Dimapur, April 24 (TYO): Mokokchung police-i tanü nikongtsütsü 4:30 ako meta Wongto Chollen ta ser auyar tetsüdi ka tanü apu. Pa ya Tuensang district kübok Hakchang yimer Bhinyimchong’er jabaso lir.
Tanep 10:00 nungi nikongtsütsü 1:00 ako tsüngda Wongto Chollen-i ki asem nung auya. Alongmen Ward nung pai ki ka kakpoka tur Rs. 80,000 alang hon azük ka auya, iba sülen Arkong Ward nung mobile phone handset ka den ATM card auya aser IM Road, Arkong Ward nunga ki ka nung Rs.6,000 auya.
Ki asemprong indang kiburtem ya shishilembartem lir aser parnok indang ki kakpoka tua auyadang parnok pei pei dokan nung liasü. Par asemprongla ya MCCI züngsem tajungtem lir, ta Mokokchung Chamber of Commerce & Industry (MCCI)-i metetdaktsü.
Mezüng ki kakpoka tur auyaba osang sangoktsüba sülen Mokokchung Police-i CCTV footage nung auer indang maitsü jangjaba sülen pa aputsü bushitsü tenzük aser tatemsa tanü nikongtsütsü MMC shopping complex anasa pa apu.
Wongto ya auer ka lir aser 2017 küm pa mezüng Mokokchung-i arur handy-man mapa inyak. Iba sülen taküm küm tetenzüklen pa Guwahati-i oa Naga restaurant nung ka nung mapa inyak. April 19 nü pa Tuensang-i aru aser April 22 nü pa Mokokchung-i adok aser pa Guwahati-i meyipa aotsüba sentong liasü.
Taküm February ita nunga pa auyaba ken o ka atema tai tongloktsü. Iba mapang pai mobile phone ka auya saka police-i ibaji nguteta kibur nem agütsü. 2018 June ita nunga police-i pa auyaba ken o ka atema apu aser District Jail Mokokchung nung puoka ayu.
Investigating Officer-i ashiba agi, tanü ki asem kakpoka tua auyaba ajakji Wongto kijai dang inyak.
Mokokchung police aser talisa Investigating Officer-i anir par teloki mapang shitak nung auer apuba atema pelar aser tenüngsang agütsür. Iba ama mapa tajung ajanga tarutsü nung ozüng alema inyakertemu temulung ulua meinyaktettsü, ta MCCI-i metetdaktsü.
District & Sessions Judge Mokokchung-ia iba ken o angadangdang auer nem tatok magütsütsü saka ozüng nung aliba ama tapet temerenshi agütsütsü amanger, ta parnokisa shisem.