Ki arongba lendong kuli bushitsü atema Kerala sorkari tuyuogo

April 09, 2016 aonung Kerala yimtiba, Thiruvananthapuram, Paravoor north nung Puttingal Devi tekülem ki anasa ‘fireworks’ mapang mi tulu adoka ki ka chirepba noksa nung angur. Iba lendong nung nisung 110 asü aser nisung 383 shi yirua liasü. Iba sentong akatsü atema district ketdangsertemi temelaba magütsüi liasü.

Kollam, April 10 (Agencies): Kerala nung Puttingal Devi tekülem ki anasa mi lendong tulu ka adoka nisung 110 shi asüba tatalokba ken o Judicial ajanga bushisüngdangtsü Kerala state cabinet-i tuyuogo.
Kollam nung special cabinet senden ka amenba sülen Chief minister, Oommen Chandy-i, Judicial commission dang bushisüngdangba osangji ita trok tsüngda agüjang ta ashitsü, ta metetdaktsü.
Iba Commission nung züngsemji retired high court judge, Justice N Krishnan Nair asütsü.
ADGP, S Anandakrishnan leniba nung crime branch-ia iba tatalokba bushisüngdangtsü. Tekülem kidangji ‘fireworks’ malitsü atema kiyong nung alir kati Paravur police station nung temepishiba ka benokba nung ajemdaker crime branch-i bushisüngdangtsü.
Ano police-ia district ketdangsertem dang tekülem kidangji iba sentong makatsü atema temelaba magütsütsüla, ta shia liasü.
Iba lendong nung yirurtem temang anepaludang intokba sen ajakji state sorkari agütsütsü lemtetogo. Taonung Chandy-i Ato kilonser Narendra Modi ajurua state cabinet-i lemtetbatem pa nem metetdaktsütsü.