Kibong ka kija tashi nung aliba ajanga terenlok mali: Amit Shah

Kakori (UP), August 13 (Agencies): Congress Party aija tanü BJP Tir, Amit Shah-i, India nüjiso anguba sülen terenlok mali, kechyiong kibong kati (Gandhi-Nehru) dang küm 60 yimsüsüa aruogo, ta ashi.
Sangküm Uttar Pradesh nung Assembly election agitsü lia Shah-i, linük tejakleni onüra state nung terenlok alitsüji nüngdak, ta ashi.
“Asenok nüjiso ngur küm 70 jungogo. Ajisüaka linük nung terenlok mali, kechiyong kibong ka kija sorkar tashi nung küm 60 liasü,” ta paisa ashi.
Independence Day atongtsü mapang ana nung lia nüjiso atema rarartemi taküm tenla agütsüba bilemteta amungba sentong nung jembidang Amit-i iba o jembi.
BJP kijai dak linük nung terenlok bener arutsütsü ta shia Amit-i, “SP mesüra BSP sorkar tashii arura parnoki kin ka kija atema dang terenlok mapa inyaktsü. BJP-i dak state nung lenla ajaklen terenlok atema inyaktsü. BJP omen ji ‘ajak asoshi külemi, ajak atema terenlok'” ta ashi.
Linük nüjiso atema rarartemi taküm tenla agütsüba bilemteta amungba sentong ‘Tiranga Yatra’ ya Monglolbarnü Ato kilonser, Narendra Modi-i Madhya Pradesh nung tenzükja liasü aser iba sentong ya August 23 tashi agiyonga aotsü.
Item sentongtem nung Union Home Minister, Rajnath Singh-i Shahjahanpur nung shilem agitsü aser Transport Minister Nitin Gadkari-i Mughalsarai nung shilem agitsü.
Kasa sentong balala nung shilem agitsüpur minister tem rongnung Uma Bharti-i Jhansi nung shilem agitsü, Ram Vilas Paswan (Akbarpur), J P Nadda (Lucknow), Chaudhary Birender Singh (Pratapgarh), Prakash Javadekar aser Kiren Rijiju (Kanpur) nunger densema lir.