Kibuba adenba tapet

Parnoki yakta Pa mapatem amadok; parnoki Pa shisa tajung ataa mali. T. Ken 106:13
Tsüngi O agütsür! Takok asoshi tashi agütsüba tongtipangtiba ka ji tsüngi o tajung aser shisa kaa agütsübaji lir. Tajung aser shisa taka tsüngi O ji asenoki nüngdaker kechiaser ka mesüra ka metenra asenok atsüngzüka alir. Shisa taka tsüngi o ji tsükchir tekülak mapa jangja angatetba asütsüla aser tsüngi O tajungji jakla tajung asütsüla. Tsüngi o shidak agütsübaji telemtetba shidak agiba nung yarir aser tejakleni oa inyaktsü yarir. Asenoki anogoshia telemtetba agitsü mapa aika ajurur aser karbo lendong aketba aser aibilena inyakba ajanga taküm nung teraksa bener arur. Iba mapa asoshi asenoki tsüngi O ji nüngdaker.
Tsüngremi tashiyim agi shinga nem tsüngi o magütsür saka shirnoki Pa nungi tsüngi o bushir Pai ajak nem tsüngi o agütsütsü mulunga agizüker. Pai shinga mesongtemer. Asenoki asen taküm asoshi lemang aisü nungi shimtsü akok. Kari pa taküm asoshi tai lemang shimtsü akok. Kari tatitangba lemang aser tai lemang shima shidakba lemangi marudang mapang tajung süidaktsür alitsü akok. Saka tajungtiba lemangji Kibuba dang ataa alitsü aser koba telemtetba agitsü Pa dang tsüngi o asüngdangbaji lir. Tsüngrem dang asüngdanga ne tarutsü mapa aser lemang shimang. Sarasadem mapangji temepishiba mapang dang masü saka Tsüngremi jembiba mapang ibai lir. Jembizüka yokba jagi sarasademji agizüker. Nai Pa nungi mangashi lira sarasademang aser Pai mejembi tashi ata liang. Nai Kibubaji ne süneptsür ka ta metetta lir ma?
Sarasadem: Temeim Oba, Nü tsüngi O meteni ni kü sasa agi taküm lenmang shimba lendong lir. Nai mulungba lenmang shimtsü kü dang N?9 tsüngi O shiangma. Amen.