Kibuba ajaklen lir

“Na kü tesülen aser tejaklen lir; aser nü teka nai kü dak nemeter. ” (T. ken 139:5)
Dawidi Kibubaji ajaklen lir ta pai metet aser pa asoshibo ibaji tepelatsü liasü. Saka kar asoshibo shiri temenen mapatem atsüka benshinür parnok atemabo iba lai tenokdangtsü ka akümer, Aji saka Kibuba chichiba meimer atemabo iba Lai agi Kibuba dak tali temulung kadaktsü.
2016 küm asen Aor chanu kati film “Emancipated” ta sür ka yanglu aser jentipur iba film ajanga temoatsü angu. Iba film nungji asangur ka pa kongisa odir ajak nungji Tsüngrem tenyar ka pa sülen anidak. Kenü pa taküm nung tamakok ka ngur taküm tempangtsü longren nungi pa sasa tsüktsü aodang iba tenyar pa anasa adok aser kümzük. Kenü ana pa party-i ao aser yangjia chia jemtepa aliba mapang iba kotak tenyar adoka süia ao. Pa asoshi tenyarji meinprongtsü ka liasü, saka tatem nungbo iba tenyar ajanga dang pa taküm lenmang shidakji shimtet.
Mashileni onüdangbo, auyanudangbo, nüktapangda benshinüdangbo Tsüngremji meinprongtsü kümdaktsür. Saka kodang asenok joko koda masü jenjang nungbo Tsüngremji asenok asoshi tenüngdaktsü tulutiba kümdaktsür. Kibuba teti asenok den alir aser ibaj i tepelatsü osang ta züngshidi.
Sarasadem
Kibuba, Na kü anasa teti aliba yong pelar; na anasa aliba yong nai ni teti kümzüka anir. Na tanga aser teti kü. den liang ma. Amen