Kibuba Anogo

Asenoki amongnü ta ajaba ya Kibuba anogo ta taoba Hokolbar ( Rogonü) nü iba osangkaket Olemsabang nung Tsüngrem tenzüker tebu tedi Rev.S.Temjen Longkumer ajanga kanga junga jangjaogo. Süra, iba Kibuba shia aruba anogo nung asenok amangba purtem mapa inyaktsüla asü meinyaktsüla, aieni aotsüla asü maotsüla mesüra dokan lapoktsüla asü melapoktsüla ta asüba tasüngdangba agi asenok rongnung mapang tatsüka shisalemsatepa arudagi. Atangji, asenok aikati tang asenoki amongba amongnü ya Tsüngremi alima aser anüng aser yangji aliba ajak yanglur anisüngzüka amongba Shabbath anogoa ta bilema amonger, ajisüaka asenoki amongba anogo amongnü ya Shabbath anogoji masü, anungji hopta nung anogo azüngba nunga tenetnübuba masü saka mezüngnü asütsü. Ibayongjiang, tangari hopta tenüng azüngdang Sunday, Monday ta tenzüka azünger. Itemji asenok aikati tangang jangjar aser iba jagi arogo nung Laishiba sayurtem tashimaitba tesem ka sayur. Reverend-bai ashiba amaji, Israel lima nung Yuhuda nungertemi, Tsüngremi anogo tenetnübuba nung anisüngzüka amongba anogo, Shabbath yabo Honibar nü amonger, ibaji hopta nung tatembangba anogo lir. Yihuda nungertemi iba Shabbath anogo ya kanga metsüngareta amonger. Iba anogo amongtsü asoshi  Israel lima nungbo Honibar anogoji dang masü saka Hokolbar nikongdang dena yaktayongi dokantem aika shibanger angutsü, kechiyong Shabbath anogo ya Hokolbar nikongdang anü aitsü minute ishika lia nungi Honibar aoung petinu asem madok tashi amonger. Iba anogo ya Yihuda nunger asoshi ki ajunga nung temo milen tsüloka yur Laishiba bushiba mapang lir. Idangji, tsüraburtemi pei chirnurtem dang Tsüngremi koda parnok tsüraburtem Egypt nung alar tia nungi aniteta moatsü, item otsütem ajak to nenshia ashir. Ibayongji, Israel (Yihuda) nungertemi Tsüngrem mamadoker aser pei tetsü taso lima meimer. Iba kasa tangatetba nung asenoka Honibar nü Shabbath amonger mesüaka, Hopta mezüngnü Yisu shia aruba anogo amongnü küma amongba anogo ya amongtsüla. Tanü asenok rongnung amongnü indang o bolua jembitsüsa adokba yabo, koma meshiteta amongtsüla ta masü saka amongnü mapa inyaktsüla asü masü mesüra shishilembatsü asü masü ta asüba onük nung o inteper. Atangji, alima tsütsüa Tsüngrem külema ta masüyonga hopta nung anogo kabaso anisüngzüka amongtsüla ta asüba tangatetba nung alima aika nung amongnü anisüngzüker. Aji oda, Khristan-tem asoshibo amongnü ya Kibuba Yisu tasü madak takok ngur shia aruba anogo lir, anungji Pa tenüngsanga külema amongba anogo, temeshi anogo lir. Atangji, Shabbath anogo mesüaka, iba anogo melen amonger asünungji, Tsüngrem shibai alima aser anüng yanglu, Pa tesüngmangtsü mapa aser o bilemteta kecha meinyaki Tsüngrem külema amongtsübajiang tim asütsü. Ajisüaka, asenoki shishilembabo masür saka amongnü aien talangibo aor ta süra, ashiko, ibajia amongnü raksaba mapa ka asütsü. Atangji, tanü putu nung mapa karbo kena maneni inyaktsüba mapa kar lir. Item rongnung osangkaket adokba mapa ya ka asütsü. Iba yimobilem yaa amongnü zülur, kechiyong amongnü mapa meinyakra Hombar nü osangkaket mangutsü. Asenok aikati amongnü ya mapa meinyaki tenla kidang oa khen ghonda ka Tsüngrem o angar aruba ya teperi amato bilemer. Ajisüaka, Yihuda nunger Shabbath amongba amato, asenok asoshia amongnü ya kidang kinunger külemi adenshia Tsüngremi kümzükba aser ajungba indang jembia Laishiba bushiba mapang asütsüla. Ibai lumiba anogo masü, anungji kokra chiyongtsü tajungtiba awazüa yur Tsüngrem tenüng sanga kinungertem külemi chiyongteptsüla. Item tongtibangtemji yutsür, asenoki amongnü shishilembaba mapatem nungang ranglokba ajanga shitakba amongnü agitsüba temoatsü magitet süidaktsür. Joko, tangbo asenokbo ozüng agi masü saka tangatetba agi amongtsüla. Atangji, amongnü ya anisüngzükba anogo saka amajok nung kazüa süidaktsüba anogo masü. Ibai Tsüngrem temoatsü aser taochi bilemteta amangba pur aser kinungertem den longjemba anogo lir.