Kibuba Anogo

Kechiyong ammang nung auer aruba amai Kibuba anogo arur ta nenoki nenok sasa jungjunga metet. 1 Tesa. 5:2.
Kibuba anogo asoshi renema alitsü Laishiba nung Khristan masüba purtem dang masü, Khristantem dang ashi, aji asü nung dang parnoki Pa dang timi langzüktsü. Kibuba anogo asoshi tongtipangtiba mapaji tejangja lir: Ibai meyimlaba mapang nung arutsü.
Laishiba nung Kibuba anogoji tetuyuba balala ashiba angutsü. Aiben ibai Yisu mezüngbuba mesüra tanabuba arutsü tetuyuba nung amshi, saka ano ibai Tsüngrem Pa nübur dang mashi mapang nung, tekümtet mesüra obendangba bener arutsü tetuyuba nunga amshi (Isa. 13:6; Yoel 2:11; Mal. 3:2). Kibuba anogoji nüburtemi bilemba dang nungi balaka asütsü ta, Amosi shin (Amos 5:18). Pa mapang nung nüburtemi Kibuba anogoji tepela aser ken tentepba mapang ka asütsü ta nüburtemi bilem, saka iba anogoji temenen o bendangba aser tejashi anogo asütsü ta Amosi ashi. Kodang Yisu mezüngbuba aru, Pai nüburtem süngmangdaktsü kechiaser parnoki Messiahji yimya balaka nung arutsü bilem, aikati pa memetet.
Tatembang anogoji Yisu tanaben aruba alitsü. Kasa mapang nung Tsüngrem ne dangi, ner kibong dangi aser tembartem taküm nung, tembartem taküm nung aser külem inyaker taküm nung Tsüngremi mapa inyakba nai mita alitsü tenüngdaktsü. Arogo pur rongnung Tsüngremi mapa balaka inyakba, nai metetta alitsüla. Taküm mapang nung tanga mapang dang nungi balaka Tsüngrem atenba metetta, nai tangar asoshi mepishitsütsü akok. Ne sasa renemang aser na meketa aliba nüburtem dak kechi ataloker metettang. Nai Kibuba anogo ana nung lir ta metettsü akok.