Kibuba anogo

Laishiba nung Kibuba arutsüba anogo asoshi jembiba yabo mamangba purtem den jembiba o ka masü saka Kibuba Yisu Khrista dak amangertem den jembiba tongtibang o ka lir, kechiyong amangba purtemi amangba nükjidongji tesüsa Kibuba den tejak o tejak na reprangtepa ajurutsübaji lir. Iba jagiang, tenyar Pauli Korint nung alirtem dang Kibuba den tejak o tejak na ngutepa ajurutepdang dang temeim indang tali metettsü yongyaba indang 1 Korint 13 nung shia aliba asenoki angur. Aji oda, tenyar Paul-i Thessalonica nung alirtem dangi zülu danga, Kibubaji auer ka ama ajungbena dang arutsü ta nenoki meteta lir ta 1 Thessalonica 5 nung shia aliba angur. Tetezü, Thessalonica nunger alirtemji Kibuba dak jungjunga amangba tamangertem liasü. Yisu Khrisa taküm alidanga, Pa tanaben arutsü indangbo Par nütsüngtem dang ashiba Mathi 24 nung shia angur. Atangji, Laishiba nung Kibuba anogo indang shia alibaji, Yisu Khrista mezüng mesüra tanabuba alimai arutsüba indang ashiba asenoki angur. Aji oda, asenok asoshibo asenok ya Yisu Khrista alimai tanaben aruba atartem lir. Ajisüaka, tekümdangtsü kaji, Paji kodangangka arutsüar memetet, anungji taküm piyong Pa den ajuruteptsü yongyaseta atar matatet, khen asenok inyaknütsü inyaka alidang, Pa aru nungbo asenok asoshi tesasatsü tulutibaji asütsü. Amos ainkeribo Kibuba aruba anogoji asenoki imlaba ama masü saka yimdong ajaklen mangyim agi asüngba tammang anogo ka asütsü ta Amos 5 nung shia aliba angur. Tetezü Kibuba aruba anogoji ken tena tsüngsangtsüba tepelatsü anogo masü saka mangyim aser tejashi agi asüngba anogo ka asütsü. Yisu Khrista mezüng alimai arudanga, nübortemi Pa dak mamang kechiyong parnoki imlaba yimya nung Pa maru. Tanü tensa nunga kodang asenoki Kibuba anogo indang shisadangdir, Kibuba anogoji pa pei nübortem kümzüktsü asoshi mesüra samatsütsü aruba anogo asütsü, iba anogoji asenoki metizüktettsü ta Malaki 3:2 aser Yoel 2:11 nung shia aliba asenoki angutsü. Atangji, tatembang anogo nung Kibuba anogoji Yisu Khrista tanaben asenok amangba purtem anii aruba anogo asütsü. Pai ibaji Yohan 14:3 nung nangzüka lir. Ajsüaka, iba tesüsaba na kümzüktsü mesüra merenshitsü atema Kibuba anogoji marudang, nü taküm aser nür kibong kümzüktsü asoshi Kibuba arutsüa akok. Ibaji asenok asoshi taochi aser temoatsü mapang ka arur asütsü. Ibaji asenok asoshi Kibuba aruba anogo asütsü. Iba anogo asoshi asenok renema atatsübajisa tongtibangba lir. Iba anogoji metettsüsa asenoki asen taküm aser kibong nung Tsüngremi inyakba mapatem reprangtettsüla. Asen kibong nung asen apuani, asen chinurtem aser asen tsüraburtem taküm tajungba küma melenshitsüsa atalokba mapang aser anogoji asenok asoshi Kibuba aruba anogoji asütsü. Item tatalokbatemji asenok tanüla tenük agi reprangtettsüla. Iba kasaji asen lokti aser arogo nung nisung kar ajanga asenok temoatsü angutsüsa mapa inyak tenzükba asenoki angutsüa akok, ibaji asenok ajak asoshi Kibuba anogo arur asütsü. Atangji, asenok dangi Kibuba aruba anogoji tepelatsü anogo dangbo masütsüa akok, saka asenok taküm aser kibong nung Kibubai asen dak mapa inyakbaji metetra, tajunga sang, tamajunga sang, asenoki Pa arubaji asen tamang aser teimla agi agizüktettsü. Asenoki metettsüba kaji, Kibuba asenok dangi arubaji jelia shioker marur saka ajungbena ka dang arur, anungji asenok taküm mapa teti renema atatsüla. Tanüa Covid-10 tashidak agi asenok amokmerenba ya asenok dangi tashidak masü Kibuba arur asütsüa akok, anungji asenokbo renemdi aser asenok meketa alirtem daka kechia ataloker, itemji sarasadema reprangdangi. Ashiko, asenoki Kibuba arur ta meteta inyakba mapatem indangji kuli asüba ajanga nübortemia “Kibuba yimli anasa lir,” ta tali tejangba metettsü.