Kibuba asen jakdang

Asenok taküm nung asenoki asen jakdang kechi angur, aji kanga tongtibang lir. Nisung kari pei jakdang teti tebilemtsü agidang sünga angur, anungji parnokjibo shitakba tebilemtsü majurudangyongi shisabolua atar. Ano asenok kari asenok lia aotsü asoshi tangar dak dang repranger, anungji tangar nemji dang asenok anishidaktsür. David taküm ya, asenok ama, tebilemtsü agi sünga aliba taküm ka liasü, saka pai kodanga pai ajuruba tebilemtsü nemji pa mekokdaktsü, kechiyong pai Tsüngrem dak dang ranglok aser Davidi Tsüngrem dang nungi mainshi ta Tenüngsang Ken 16:8 nung shia angur. Iba Lai tekong ya Tsüngrem dak dang temulung ajak yur indangindanga alir nisungi sarasademba ola ka lir. Iba sarasadem nung David-i ashir, ” Ni teti Kibuba tama südaktsü , kechiyong Pa kü tachiji lir, anungji ni kodanga Pa nungi mainshitsü.” Asenokia David-i sarasademba amai sarasadem sütetter asü masü ta bilemdangtsübaji kanga tongtibang lir. David-iang Saul chuba tetsübu tulu nung lia tsükchir ket nungi kümzük, saka tia majung Saul dak tenükmerem liasü, anungji pai David tepsetsü bushi, ajisüaka meyiper David-iang pa tepsettsüsa mapang kati aru. Asenok ya David asünungbo, Goliath tekolak tangzükba ama, Saul meyong noklangnok atsütetter pa kolakjia tangzükla. Ajisüaka, iba ama tensa ka nunga, David-ibo ashi, ” Ni Kibuba tama südaktsütsü.” Tetezü, pai mulungba masü Kibubai mulungba inyaktsü ta asüba mulunglemtet tulu liasü. Shitakba nungbo David ya Saul tsüngdang nungi tetsübu agi jenshir nisung ka liasü, saka pa teka tachijilen abenbaji nok nü masü saka Kibuba tashi liasü. Iba tamang jagi Kibuba dak mulung alemba nungi pai marakzü aser mainshi. Tanü asenoka tetsübu tia nung tashidak wara tamajung nungi ajenba mapang ka lir. Iba ama mapang nung asenokia shiba dak temulung alemer aser shiba tama südaktsür. Asenokibo asenok jakdang tasüba waraji dang angur asü ? Iba tebilemtsü agi asenok shisabolua ali asü ? Iba tashidak wara den raratsüsa asenok dak tashi mali amai bilemer asü ? Iba ama mapang nung, David ama, asenok tachijilen amba hadirji Kibuba nungi anguba tashiji südaktsüdi. Iba tashi jagibo Goliath akokba ama alima shisatsü aser mozü agi makokbatema akoktsü. Kasa Tenüngsang Ken 16 nung David-i Kibuba dang ashir, ” Ni Kümzükang, Oh Kibuba , kechiyong ni nü dak jenoker, najiang kü Kibuba, nü dak alema tajung kecha mali.” David-i sarasaademba sarasadem ya tanü asenok sarasadem asütsüla. Yashi tashi asenoki asen madak rongsen aser shi azü jangraba mapatemang kibur ama kümdaktsür, asenokbo kodanga meshirangtsü aser kodanga masütsü ama bilema ngasangatema liogo. Ajisüaka, tanübo asenok Yisu Khristaji asen taküm aser kibong nung kibur kümdaktsür Pa dak mejenokra tejenokdak maka kümogo. Iba ama tensa ka nung, asenokia David-i sarasademba amaji, Yisu Khrista dang ” na dang kü Kibuba” ta shitettsüla. Atangji, asenoki meteta tai aika mena nungji, Tsüngremi asen sarasadembo melangzütsü amai bilema alitsüa akok, saka Yisui ashir, ” nenok shisabolu khuret taret bena alirtem ajak kü dangi arung, ni nenok khuretji pongpadaktsüdi.” Mathi 11: 28’30. Iba lima nung asenok asoshi timtem shisabolu khuret kecha mali ta Yisui mashir, saka Yisui ashibaji kodang tanü ama asenok shisabolu khuret agi tongdir, pai asenok nem anisüngzük aser tesünep agütsütsü (Yohan 14:27). Tesünep ya shisabolu mapang mozü tajungtiba lir. Iba mozüji Yisui asenok nem agütsür ogo. Anungji, shibaisa pei taküm nung Kibuba tama südaktsür, parjibo alima tebilemtsü agi sünga liaka tesünep nung alitsü. Yisu sülen anidakertembo kodanga khuret aser tetsübu tensa majurutsü ta masü saka ajurutsü. Ajisüaka, tesünep angutsü. Tesünep anguba temaitsüji tetsübu liaka metsübutsü. Tenyar Stephen aser Paul nungertem dak iba tesünepji liasü, iba jagiang parnok anema inyakertem parnoki metsübu aser taidoktet. Tanü asenoka iba tesünepji meshia Kibuba dang na dang onok taküm nung kibur ta shidi aser tang dang masü teti asen jakdang Pa tama südaktsüdi.