Kibuba dang ataba

Nisung ajak atema atatsüba ya mapa tasak ka lir. Asenok nüngdak aika lir aser ibaji asenoki tangsa dang aginer. Asenoki manger sangwa nung takar-tulur kümner aser mapa meinyaki tepok sünga linür. Ajisüaka, asenok taküm alima nung liyonga aotsüba atema Tsüngremi asenok nem mapa aser mapang shimtetja lir. Aji oda, Tsüngremer mapangji meteta asenoki aremzüka atatsü aser inyaktsübaji kanga tenüngdaktsü. Asenoki anogo shia asen nüngdak inyaker saka takok aser tajangzükjibo Tsüngremi dang agütsür asünungji, Pai agütsü aser moatsü atatsübaji kanga tongtibang akümer. Alima nung ya asen nüngdak asoshi matayonga odang angur asünungbo Tsüngrem dak amanga imlatsü nüngdak madokla. Ajisüaka, Tsüngrem dang asen nüngdak atalokjang ta sarasadema ataba teimla jagi asenok Tsüngrem dak dang mulung lema alitsüsa akümer. Tetezü asen nüngdak langka ka atema aremzüka atadang, Tsüngrem dak amanga imlaba agi asen o Tsüngrem na tsüngda anogo shia tesendaktep ayur. Aji oda, nisung ajak dang nungi alaka Khristan taküm ka asoshi atatsüba ya kanga tongtibang lir. Tsüngremer mapang aser anogo tera matateti asenok aritepdang teti atema taküm nung takoksa tulu angutsü ta asenoki angatettsüla. Tsüngremer mapang atatsübaji David-i meteta liasü. Tila tanur David sannüka alidang Tsüngrem nisung ajanga kenü anogo pa Israel madak chuba akümtsü atema mezüja shimteter yutsü. Asenok asübo iba anogo nungi asüküm tenzükla. Asenok ka asübo iba anogo nungi sannükia moula, ki mapa meinyakla aser tsüraburtem danga tashi mangala aser taintem aküm metsübula. Asen ka asübo chuba akümtsü mezüja shimteta toktsüba anogo nungi yimsü tesüdak yimsüsür aser chuba arishi tenzükla. Aji oda, asen ka asübo chuba asütsü shina toktsüba anoog nungi chuba ama bilema ngasangatema lila. Ajisüaka, tila tanur David-i pa chuba akümtsübaji Tsüngremer mapang ka nung dang akümtsü ta meteta liasü. Pai Saul chuba tepseter pa melen chuba akümtsü koka liasü, saka pai metepset. Pa chuba akümtsübo mezüja shimteta yutsü, saka pa chuba makümdang pa timtem lendong tului ai. Pa jakdang Israel nunger tamakok aiben ajuru. Pa taküm kümzüktsü asoshi arem nung jenshia senzü. Ajisüaka, David-i Tsüngremer anogo matong tashi pai pasasa chuba maküm. Pa arem nung tsükchir tsüngdang jenshia senzüdangang pai Tsüngrem den jajatsü tenzük. Pai Tsüngrem dak jenok. Iba mapang pai mejemba kentem tanü asenok asoshi tashi tasen angudak küma asenoki Tenüngsang ken azünger. Aji oda, David chuba kümer külen ano pa dak nungi jakzükba nungiang asen Kümtetdakba Yisu Khrista iba limai aru. Item ajakji nisungi Tsüngrem dak amanga ataba temoatsütem lir. Aji oda, Tenüngsang Ken 27:14 nung David-i Kibuba dak teimla ayutsü indang shia lir. Tetezü, Tsüngremer mapang ka matong tashi teimla mesamai atatettsüla. Tsüngremer mapang ka ataba ajanga Yisuia Lazar tasü nungi shia arudaktsütet. Ashiko, Yisui tebu Tsüngremer mapang ka matatet asübo Lazar-a  tanaben shia marula. (Yohan 11). Nai Tsüngremer mapang ka atema aremzüka ataa lira temoatsü, kechiyong Isaia 40:31 nung ashir, ” Shirnoki Kibuba dang ataa alir, parnok tashi tasen angutsü, mongzütem ama tashikang agi atutsü, parnok asemtsü saka manitsü, parnok jajatsü saka melulatsü.” David timtem nung liaka, pai ashir, ni akümli nung Kibubai kü dang ajungba angutsü (T.Ken 27:13). David-i item tajung anogotem atema aremzüka ata aser pai angu.Pa mongzü tashikdang tener atuba ama chuba mendeni tudaktsü aser takar kümdaktsü,pa ania maküm aser melula. Tsüngremi nangzükbabo inyaker, asenoki Pa mapangji meteta atatettsüla.