Kibuba Kidangi Aodang Na Kümdanga Jajaang Sayutsungir 5:1 lapokba

Kohima Ao Baptist Arogo tenlaki tasenba Deobarnü 9 baji nung Rev M.Asangba Senior Pastor ajanga lapokba Tir Yimyim aser osang kaketem nung nguogo kanga pelaa züngogo. Ibai Kohima Ao Arogo asoshi kanga nümatangtsü mapa ka lir. Tanü sen makaba mapang ka nung 26 crore tashi bendena yanglubaji aieka asoshi tesüngmangtsü mapa ka lir.
Tia kaa nia iba tenlaki lapokba sentep nung dena liasü. Kohima Ao Arogo nung baptiba nütsüng 5000 lir ta angashir. Saka kanga dang tesasatsükaji iba tenlaki nung nisung 2500 dang mentettsü ta angashir. Ano 3rd Sunday nungbo ajak combined senteptsü ta angashir. Aji shidak süra aser tenlaki nung nisung 2500 dang mentettsü ta süra combined aliba Deobarnü nisung 2500 sentepi marudaktsütsübaji tenzükertem tepilemtsü. Ano Kohima nung asen Aortem kibong shia car ana asem lir. Tebo o tetsüna amentsü car ka, par chir atema car ka aser parnok ajak pei pei car nung dang mener sentepi aor. Iba jagi tangar den parking rakteba 9 baji nungi sentep tenzüker. Ibai tepilemtsü kanga tulu. Sentepi aotsü dang nungi tesenshitsü atema tepilemtsü tuluba. Sentepbo 10:30 nung senshi. Saka car onsaraba agi traffic jam sür kibo 12:13 nungang adong. Ibai ken bilemdangtsüla.
Ano adem nung marble sen jendi alangba marble lema lir. Iba marble nung tetsürtem pencil hill asemertembo ajudoker alangtsü ta sensena pilemer. Ano nisung 2500 senshidang step tera menüka yangluba agi nungteptsüsa akümer. Tia maka sentep nung liaa menoknok anok nungbo nisungtem nungtepa asütsü ana nung lir. Aujato oda Tsüngrem külemer senshidang nungtepa asüyunga oda nungtepa Kodaki aotsü ta bilemer. Aji saka yamala nungtebaji majung. Ano onok tilar aser makamaitertembo tsünglangba sentepki nung menang ta ashiji hai ta sür lua menogo. Deacontemi nenok kecha shisa tebulu TV screen tulu aser sound system peria yuja lirji nenoki sentep nung shilem agirtem tejak o tejak na chiteba jembir amai angutsü ta ashiji pelaseta lua mena liasü. Kodang sentep tenzük kecha mangashi aser TV screen-a junga function masüji oda meipronga mener senshi.
Anungji ni yamai ku tepilemba shidanger:
Mezüngbuba nung 3rd Sunday ajak nung nisung 2500 dang menerbo tanüngbaji koda asütsü. Anungji oda Deobar sentep ajak pei pei fellowship nung akatsüla. Tongtipang sentep kar nung nütsüng ajak külemi senteptsüsa sentong kar lira NBCC Convention Center nung mesüra Public ground nung sentep tajungba asütsü.
Tanabuba nung KABA Arogo sen 26 crore indoka sentep ki yanglur iba tenlaki nung sound system tajung inoktsü atema kecha tepilemtsü malitsü. Anungji Public address system masü saka stereo sound system inoktsüla. Speaker syntex tulu amai amentepa yur iba anasa amenertembo ola agi jakbanger temolungjang tashidak adoktsü amai bilemer. Anungji tayimtsü nung inokba ama ola tanük saka tejangja speaker stereo system inoktsüla.
Tasembuba nung tang Fellowship shia nung Choirtem atema tsüngbang nungi microphone sangzüa alua ayuba ya teprangtsü kanga majung angur. Anungji Choir menden shia nung cordless microphone peria menaloka yanglutsütsüla.
Yamaji inyak nungbo kang ajungtsü ta kü tepilemba lemsateper.

– Nenok adianu Kijamangyang, kija2019@gmail.com