Kibubai pei pur meteter

“Kibubai pei pur meteter aser shibai Kibuba tenüng tushidir pa memeshiba nungi piladakjang”. 2 Timoti 2:19

Yisu Khristai bener aruba osangtajung ajanga menenpur ka Tsüngrem tsüngdang temeden angur, temeshi nisung kümdaktsür aser Tsüngremi mulungba lenmang nung jajar. Peter-i tenemnü benjung nung sayutsüngir, temulung meyiper dang memeshiba yimya nungi pila alitsü ajungshi. T.Mapa 2:40. Yisu dak amangba ajanga taküm tasen pokteter. Taküm tasen nung yimya, jakla-libaliro tasen akümer kechiyong taküm tasen akümertem Tsüngrem Tanelai azüoker aser memeshiba nungi pila alir. Saul temulung memeyipdang Arogo anemer nisung ka liasü, saka Damaska among nung Khrista ajurur külen, pa Arogo yanglur tongti ka aküm.
Yihuda Iskariot Yisu nütsüng ka liasü, Yisui tesüngmangtsü mapa inyakba angu saka pa taküm tasen maküm nungji pa dak aliba ashikülak mulungsentsü agi tatem nung Yisu ashioktsü. Yisui bener arutsüba tekümtet ya temenen nungi alangzüktsü aser teti asoshi Kotaki aotsü renemtsüba dang masü saka alima nung alidang memeshiba lenmang nungi piladaktsütsü tashi agütsür. Memeshiba lenmang nungi pila litetba takümji Kibuba meyong temaitsü lir.

Sarasadem
Temei Tsüngrem, memeshiba nungi pila alitsü Ne tashi meshir. Amen