New Delhi, October 29 (Agencies): India nunger badminton asayar Kidambi Srikanth-i maneni kanga junga asayateta French Open Super Series Premier kokogo. Final asaya nung pai Japan nunger asayar Kenta Nishimoto 21-14, 21-13 agi kokogo.
Iba takok ya dena Srikanth-i taküm küm Super Series pezü kokogo, aser iba ajanga pa Lee Chong Wei, Lin Dan aser Chen long nunger den yongrü kati iogo. Parnok asem sülen küm ka nung super series pezü akoker rongnung Srikanth pezübuba kümogo.
Srikanth-i final matong tsüngda semifinal nung külem India nunger asayar HS Prannoy akok aser kasa asayaba yimya nung pai final asayaa kokogo. Pa ya India nunger asayartem rongnungi jenjang temaba nung lir. Final asaya nung Srikanth-i minute 35 agia Nishimoto akok aser iba takok ajanga pa otsü kaket nung züluokogo.
Srikanth-i iba asayamung akokba osang angazüka social media balala ajanga pa nem tenüngsang agütsü manener. Tenüngsang agütsürtem rongnung Ato Kilonser Narendra Modi densema lir, pai French Open Super Series akokba atema linük ajunga tenüng nung Srikanth tenüng asang. BJP tir Amit Shah-ia pa dang ‘champ’ta jaa pa tenüng asang. Maneni Andhra Pradesh Chief Minister, N Chandrababu Naidu aser Rajasthan Chief Minister, Vasundhara Raje nungeria French Open nung Srikanth-i takok tajung anguba atema pa tenüng asang.
Kidambi Srikanth French Open Super Series kokogo added by nungsang on
View all posts by nungsang →
You must be logged in to post a comment Login