Kidambi Srikanth India Open final-i iogo

New Delhi, Metsüremi/March 30 (Agencies): Ita 17 tashi asayamung kecha nunga takok ngua masayai arur Kidambi Srikanth Honibarnü tang tasayadak Indian Open tebur kija asaya final tongtetogo
Taoba küm Commonwealth Games nung Srikanth-i final tonga asayaogo saka 2017 küm October ita French Open akokba sülen BWF superseries mesera BWF World Tour tournament ka nunga danga final tonga asayateta mali.
Arishi küm 26 tain India nunger nüngtugu badminton asayar yagi semifinal asaya nung 14-21 21-16 21-19 agi China nunger asayar Huang Yuxiang madak takok nguogo. Pa final nung second seed Viktor Axelsen mesera India nunger asayar Parupalli Kashyap den asayatsü.
“Mapang talang ka lir tangang asayamung ka final tongtetogo. Ni idaki final asayatsü atema maongka anguba atema kanga pelar,” ta Srikanth-i ashi.
“Deciding asaya nung tesülen liasü saka iba asaya koktetba atema kanga pelar. Kü pusemertemi ni tejakleni oa asayatsü asoshi kanga ajungmesogo,” ta paisa ashi.
Mezüngbuba game nung Srikanth-i rally talanglang asayatsü atema tesüleni shuttle talanglang zük-keta yokba den shuttle kanga flat süa asaya saka Huang-ia pa tasa den meneptepa asayaa arur India nunger asayar yagi point timtiba nguteta 11-10 nung break agi.
Iba sülen tena tsüngda maneni toktepa asayar Srikanth-i net nung point kar manguba sülen Huang 18-14 agi timba aküm. Srikanth-i game point ana tashi kümzüktet saka court adena shuttle matokba sülen mezüngbuba game makok.
Tanabuba asaya nung Srikanth-i tajungba asayaa point 8-4 aküm aser mapang tatsüka dang lir point 11-4 nguteta break agi.
Iba sülen pai maneni kanga junga asayateta asaya akok.
Deciding asaya nung Srikanth point (8-7) ka agi tesülen liasü, saka break mapang tashi nung pa point timba küma 11-10 nung anen.
Court melentepba sülen Srikanth-i maneni rally talanglang nung shilem agia asaya saka pai court tezülen aser adena züktokba ajanga Huang 15-17 agi tejakdang aküm.
Iba sülen Srikanth-i line nung smash tajung ka malokja point 18-18 aküm aser Huang-i anaben tashi tezüleni matokba sülen Srikanth nem match points ana agütsü. China nunger asayar yagi match points kabo kümzüktet saka net nung shuttle zükdaktsüba sülen Srikanth-i asaya akok.