Kidang sen rizünga teyu, nüngdak mapang nungang bank-i oa agizükang: RBI

Nov. 13, 2016 nü New Delhi, Parliament Street nung aliba Post Office ka nung nüburtemi Rs.500 aser Rs.1000 note tejen melentsü atema tarensena nokdakba noksa nung angur. 

New Delhi/Nashik, November 13 (Agencies): Tanü Deobarnü Reserve Bank of India (RBI)-i nüburtem dang, sen note tila ajak Centre aser bank tem ket nung lir, anungji nisungtemi sen agizüka rizünga mayutsüla saka nüngdakba mapang nung ang bank-i oa agizükdaktsüner, ta metetdaktsü.
“Reserve Bank-i nüburtem arendaka melidaktsüner; bank-i tanen makai arua sen agizüka merizüngdaktsüner; nenoki nüngdakdang sen angutsü,” ta SBI-i tanü sangdong ka ajanga metetdaktsü.
Deobarnüa linük tesem ajaklen bank aser ATMs nung nisung kanga longsoa liasü, aser branch tem nungbo anepongi nisung jenti adenshia liasü.
Asüng Hombarnü linük tesem kar nung bank tem shibangtsü, iba yongji ATMS aika nung sen atemba ajanga nisungtem bank kongsangtem nung longsogo.
Ato kilonser, Narendra Modi-i sen 500 aser 1000 note anentsüba osang sangdongba sülen anogo pongu nung ATMs shilem 60 nung ang sen junga agizüktet. Ano linük nung ATMs lakh 2 nungi lakh 1.2 nungji-a ghonda ishika tsüngda sen atem.
Centre sorkar aser RBI-i nüburtem dang sen peria lir, anungji nüburtemi aremzüka atatsüla ta mepishia arudar.
Honibarnü osangbenertem senden ka nung Union Finance Minister, Arun Jaitley-i, linük nung Automated Teller Machines (ATM) mapa junga inyaktsü atema hopta ana-asem shi agitsü ta metetdakja liasü.
CNP-i Rs 500 tasen million 5 agütsüogo
Linük sensotem melung anisüngzüktsüsa Nashik nung aliba Currency Note Press (CNP)-i Reserve Bank of India (RBI) nem Rs 500 note tasen million 5 agütsüogo, ta tanü osang ka ajanga metetdaktsü.
Ketdangser kati, “CNP-i sen note 500 tasenba million 5 agütsüogo, aser ano million 5 Bodhbarnü agütsütsü,” ta metetdaktsü.
“Linük nung sen menüngba- Security Printing & Minting Corporation of India Ltd (SPMCIL) unit 9 rongnung CNP yaa ka lir, aser parnoki Rs 20, Rs 50 aser Rs 100 note jenti menüngdar,” ta ketdangserisa metetdaktsü.
Mongolbar ayaterm nungi sorkari Rs 500 aser Rs 1,000 notes anentsüba sülen tang Rs 500 aser Rs 2,000 tasen menüngdar. Tang Rs 2,000 note bo agütsüdar saka Rs 500 note bo magütsüi lir.
Osang ka ajanga ashiba agi, RBI-i Rs 2,000 aser Rs 500 note ji Mysore (Karnataka) aser Salboni (West Bengal) na nung aliba printing units ana nung menüngdar. Ano Rs 500 note SPMCIL indang press ana Nashik aser Dewas (Madhya Pradesh) nunga menüngdar.
Kasa osang ajanga ashiba agi, taküm financial year tembang tashi nung Rs 500 note million 400 agütsütsü atema CNP dang tuyuogo. Sen tasen note ya hopta ana tejaklen nungi tenzüka menünger.
SPMCIL-i sen notes, security documents menünger aser senjang yanglur. SPMCIL indang units teku lir aser item rongnung Nashik aser Hyderabad na nung anana lir aser Mumbai, Kolkata, Noida, Dewas aser Hoshangabad shia nung kaka lir.