Kidanger den libaliro

Alima nung nisung asoshi tangar den putepa libalirua aotsüba purtem rongnung tongtibang telokji kidangertem asütsü. Kidangertemji, talang nung aliba tsürabur aser kinunger tajungtem dang nungi taoba aser tenüngdakba, kechiyong kinungertem denjibo anogo shia külemibo melitettsüa akok saka  kidangertem denbo anogo shia külemi alitsü. Aji oda, timtem lendong mapang nunga kidangertemi dang tama yaritettsü aser kümzüktettsü. Item nüngdaktemji meteta ali tilaka mesüra kilentsü mesüra süngdong ka asoshibo katia-katia kidangertem den tamajung magitepi aremzüktepa, yabo nür agiang, ajibo nür meyong sang ta imli agütsütepa awashi meteta alitsübaji kanga tenüngdaktsü. Aji oda, alima nung tepelatsü aser temoatsü tulutibaji kidanger o kidanger na aon kentsütepa aser kidangjendangi otepba alibaji asütsü. Iba ama kidanger o kidanger na putepa aliba ajanga kiyong nung aser pei alidak nübortem asoshi mapa tajung tulu inyaktettsü. Iba kasaji yimten tsütsüa kidanger lima aser kintem den putepa alitsübaji kanga tongtibang lir. Yimten tsütsü balaka kidangerji alima mesama tashi kidanger asütsü, anungji kidanger agi pei kinunger aser adianu kümer akok tashi yaritepa alitsübaji ajak asoshi tongtibang asütsü. Aji oda, Nagaland asoshi tanü tongtibang teinyaktsü kaji kidanger state-tem den putepa alitsü lenmang bushiteptsüba ya asütsü. Tanübo, tia maka Nagaland kidanger India kübok Assam aser Manipur na den putepa melitetter. Ibaji arrtsü junga melangtetba ajanga lir. Ano, talisa Naga nunger lushi ajak Naga yimten tasen ka kübok yunüba tejangraba agi kidanger ana den ya aiben meputeptettsüsa adoker. Tanga, Naga Students’ Federation (NSF) teloki Manipur sorkar dang jashiba agi Nagaland ajanga Manipur gari mejajadaktsür. Atangji, NSF teloki Manipur sorkar dang tejashi sayua Nagaland ajanga Manipur gari mejajadaktsübaji tang mezüng masü saka tamalena aiben yamaji inyakogo. Ajisüaka, iba jagi kidanger state ana tsüngda tesendaktepbo tamajungba akümer. Iba amaji masütsüsa Manipur aser Nagaland sorkari inyaktsüla. Iba kasaji Kaketshirtem rongnunga  kidangertem putepa alitsü asoshi külem telongjem ka tenüng agi North East Students’ Organasition (NESO) tenteta lir, anungji tang ama kidanger o kidanger na tsüngda tamajung chiteptsüsa kaketshirtem rongnung ataloka angudang NESO-i tebang aitsüla. Northeast nung ya balaka kaketshirtem longjema alitsü kanga nüngdaker, kechiyong kidang balala amai pei pei litepyonga Delhi tongerbo Northeast purtemji tangaribo ajak ka amai züngshir. Iba tangatetba nung NESO teloki NSF o Manipur Kaketshir Telongjem na ajurutepa tajung ka jembitetra, NESO tentetba tajangzükji aji ka asütsü. Imphal lenden nung Manipur police-temi NSF lenirtem akümtsübua yaritsü melen mezüngmeshibaji tejashitsüka aser iba atemaji parnoki taidok meshitsüla. Iba jagi NSF purtem jashibaji tim nung jashir ta shitetter. Aji oda, Manipur sorkar dang tejashi sayua inyaktsübaji tanga lenmang maliba agi Nagaland ajanga parnok gariji mejajadaktsür südi. Ajisüaka, iba jagi parnok dang masü saka asenoka dena akoksar. Ano, asenok akoksaba mapa kaji Nagaland nung timtem agütsüba agi Manipur leni khu bener aoba gari ajak Nagaland (Dimapur) matongdang Khakati nung anena anisüngzüker. Iba jagia lenmang aisü nung Nagaland akoksar. Aji oda, aiben asenoki parnok dang jashi sayua tang amai Manipur leni khu abenba gari kata meyoki nokdangba ajanga Nagaland majangi Imphal leni khu abenba gari dang masü saka train dena aotsüsa mapa inyak tenzükogo. Iba amaji tanü asenoki parnok timtemdaktsüba agi tarutsü asoshibo parnok ajangzüktsüsa parnokibo inyaktetter. Item ajakji yutsür, Naga nunger yimten tebilemtsü liang teli, Assam aser Manipur na yabo teti asoshi kidanger asütsü, anungji kechisüdirsüaka tena denji asenok putepa alitsüla. Aji oda, yimten aser arrtsü nung tebilemtsü liaka mali amato bilema mapang mapang shia NSF o AASU na aser NSF o AMSU na sobaliba sentong tajung yanglua ajurutepa lira, iba jagi yimten aser arrtsü tebilemtsüjia mali kümadoktsü. Arrtsü ladanga yur meputep aliba dang nungibo arrtsü meladangyonga putepa litetra, ibajiang ajak asoshi tajung aser tajangzük asütsü.