Kidanger linüki India linük tashi meitdaktsütsü meranger: Rajnath

Fatehgrah Sahib (Punjab), June 26 (Agencies): Pakistan aitsüba olen ka nung Deobarnü Fatehgrah Sahib, Punjab nung Union Home Minister, Rajnath Singh-i, kidanger linüki India tashi meitdaktsütsü meranger ta aitsüba den külemi pai, kiralongrari amakdang CRPF sepai ti asüba bushisüngdangtsü atema committee ka Pampore-i yoktsü, ta metetdaktsü.
Rajnath-i, “Tarutsü nung asenoki melenshia inyaktsü aser item ama tatalokbatem nung nisung masütsü atema tashimait bushitsü asoshi ni Home Secretary dang züngsem anati akümba committee ka Pampore-i yoktsü tuyuogo,” ta metetdaktsü.
Yashi kiralongrartemi CRPF amakdang sepaitemia kiralongrar ana kahsetba atema pai sepaitem nem tenüngsang agütsü.
Sikh nunger nokinketer, Baba Banda Singh Bahadur-i taküm bendanga agütsüba anogomung 300buba sentong nung jembidang Rajnath Singh-i, “Asen security sepaitem tasü aitba atema ni tenüngsang agütsür. Parnok tasütait mapaji ni tushir. Kiralongrartemi ashikülak ajanga parnok (security sepaitem) amak. Ajisüaka asen sepaitemi kiralongrar ana kahset,” ta ashi.
Home minister-i ashiba agi, linük tashi meitdaktsütsü merangertem anema linük lanurtemi nokdaktsüla.
“Item kiralongrartem aser asen kidanger linüki India tashi meitdaktsütsü meranger. Item ama anema nokdaktsü atema ni India lanurtem ayongzüker,” ta Singh-i ashi.
Paisa, “Taküm bendanga agütsür sepaitemji India-i mamatoktsü. Tang parnok asen den meliaka asenoki parnok nem tetushi agütsür,” ta ashi.
Yashi Kashmir, Pampore nung kiralongrartemi CRPF indang bus ka injang amshia amakdang CRPF sepai 8 kahset aser sepai 21 mejungi yirutsü.
“Iba ama mapang ka nung asenoki Banda Singh Bahadur ama linük atema taküm bendanga agütsütsü melunger tasütait nisungtem nüngdaker. Item ama nisungtemi linük kümzüka yutettsü,” ta paisa ashi.