Telungpur tesep samatsütsüla: Tarun Gogoi

Guwahati, July 17 (Agencies): Hokolbar nü Assam Chief Minister Tarun Gogoi-i Bhutan, Bangladesh aser Myanmar linüktem nung telungpur tesep samatsütsü nüngdak, ta ashi.
Guwahati nung osangbenertem den jembidang Gogoi-i, “Item linüktem nung northeast telungpurtem chiyungtsü, tejenokdak angur aser training agir. India-Myanmar arrtsülen security tashi itshitsü nüngdak,” ta ashi.
“Arrtsü anüker sepaitem timba kümtsütsüla. Ibaji ajanga telungpurtem India telungi aitba nokdangtsü,” ta pai ashi.
Gogoi-i, telungpur teloktem asoshi Myanmar ya tejenoktak tajung ka asüba ya state aser tesem (NE) asoshi amokmeren tulutiba lir, ta ashi.
“Myanmar nung tejenoktak aliba ya asenok asoshi amokmeren tulutiba lir, tanabuba nung Bangladesh lir. Tawa Union Home minister den security senden aliba mapang ni, Northeast nung security alitsü asoshi tejenoktak ya samatsütsüla ta shiogo,” ta Assam CM-isa ashi.
“Chief minister tem (NE CM tem) den senden amenba mapang ni Union home minister dang Myanmar sorkar teyari agia Myanmar nung mita aotsü nüngdak ta shiogo. Myanmar nung operation maparen ajak tenzüka aotsüla,” ta paisa ashi.
Gogoi-i ashiba agi, Tinsukia district nung ken o mejembiba ULFA (United Liberation Front of Asom) telungpurtemi rara adokdaktsüba sülen Rajnath Singh-i pa den phone ajanga jembiogo. Mongolbar nü ULFA telungpurtemi district nung nisung ana kahset.
Tinsukia nung nisung tepsetba dak sentakba nung Assam Police-i ULFA den tesentaktep alir nisung ana puogo, ta paisa ashi.
“ULFA anema mita aoba tenzükogo. Par teloki Jorhat aser Guwahati na nung anema inyakba maparen inyaktsü meranger ta onoki osang angashiogo,” ta Gogoi-i ashi.