Kidima nung Quarantine Check Post ka lapok

Dimapur, Metsüremi (March) 27 (TYO): Animal Husbandry and Veterinary Services Director, Dr. I.P. Khala-i Kidima nung Quarantine Check Post ka lapoktsüogo.
Manipur den arrtsüa aliba Kidima nung Metsüremi (March) 27 nü Dr. I. P. Khala-i Check Post lapoktsüogo.
2003 küm pa Veterinary Surgeon ka inyakdang iba tesem semdanga liasü. Quarantine Check Post ajanga shirurutem dak aketba tashidaktem azüoktsü aser iba nung Department-i mozü timi agütsütettsü atema nübortemi shilem agitsüla, ta Khala-i ashi.
Khuzama nung aliba Department doctori Kidima nung mapa repsema inyaktsü, ta paisa shisem.
Sentong nung Additional Director, Dr. Viral Yore-i Kidima nung Quarantine Check Post lapokba indang otsü tatsü agi metetdaktsü.
Paisa yimdaklirtem dang check post nem electricity aser tzü peria agütsütsü atema mepishi.
Shirurutem tesem ka nungi ka belenshidang tashidaktem mita reprangtsü atema check post ya lapoker aser iba lapoktsü atema aliji par kidongi agütsü, ta Yore-isa shisem.
Sentong nung mendenji Deputy CVO, Kohima, Dr. Joseph M. Angami liasü, CRC Kidima Pastor, Vidise Pucho-i temoatsü meshia sarasadem, Kidima Village Council secretary, Kethozeho Kiso-i yim tenüng nung o jembi aser VDB Secretary, Kevizeho Rote-i anküp tepela o jembi.