Kiir-i sorkar anemer lenisang, Machar S Sudan VP shimer

Juba, February 12 (Agencies): South South’er teloktep sorkar tasenba nung Tatong Tir inyaktsü asoshi S Sudan Tir, Salva Kiir-i sorkar anemer lenisang, Riek Machar shimogo.
Tan Machar S Sudan Tatong Tir shimba sülen Machar-i kobi meli Juba yimtiba bushia arutsü imlaba olen ka Kiir-i metetdaktsüogo.
Par S Sudan nung yimtenren tensa tajungba kümdakja par linük nung yimji yimjung lidaktsütsü asoshi mera tajung agiba atema pelaba olen ka metetdaktsüba den külemi, pa teloktep sorkar tasenba nung Tatong Tir shimbaren agizükba olen ka Machar-ia metetdaktsüogo.
“S Sudan-i linük tensa tajungba kümdaktsütsü asoshi mera tajung agiba atema kanga pelar. Iba alizüng asangsang nung ajangzüktsü asoshi S Sudan-i tekaraba mapang nung teloktep sorkar tentettsü nungdaker,” ta pai shisem.
Par linük nung yimji yimjung lidaktsütsü nükjidong nung Kiir-i aniba sorkar aser Machar-i aniba sorkar anemer na tsüngda yaküm, 2015 küm August ita agiba yimjung tezüngzüktep mapa küma inyaka, tan Machar teloktep sorkar nung Tatong Tir inyaktsü asoshi shimer lir.
Machar ya 2013 küm tashi Kiir’er deputy ama tenzük saka pa lenisütsü menden nungi anentsüba sülen par linük nung rong rong tulu adoka tensa kanga mejungi aküm.
Iba mapang nungi tenzüka tanü tashi Machar-i par S Sudan toktsür Ethiopia nung jenoka lir.
Sudan linük nungi jakzüka 2011 küm linük tasen ka akümba S Sudan linük ya alima ajunga nung linük tanubotiba lir.
Ajisüaka, Kiir-i aniba sorkar mitkar aser Machar pusemba sorkar anemertem na tsüngda tongpang kanga sashia raraba ajanga S Sudan nüburtemi tebang agi meshitetba timtem toushi ajurua lir.
Par telok ana tsüngda tongpang kanga sashia raraba ajanga nübur meyirijang jenti tepsetba den külemi, par nübur nisung million 2 dak temai pei talidak toktsüsüa akümba aser par linük tesem aika nung ayawara tia ajurua aliba osang bushiteta lir.
“Küm 2 tashi tongpang raraba ajanga bener arutsü teraksabaren tanaben yanglushitsü mapapren nung regional aser alima lenirtemi ozü S Sudan nungita yaritsü mepishir,” ta Machar-isa metetdaktsüogo.