Kijai tashi amshisang, Modi yimtenren nungi agientsü: Mamata

Kolkata (West Bengal), November 28, 2016: Centre sorkari sen 500 aser 1,000 notes anentsüba anema tanü Kolkata yimti nung West Bengal Chief Minister, Mamata Banerjee-i anir party nung inyakertemi longkak aita jajaba noksa nung angur. 

Kolkata, November 28 (Agencies): Trinamool Congress (TMC) tongti aser West Bengal Chief Minister, Mamata Banerjee-i Ato kilonser, Narendra Modi yimtenren nungi agientsü, kechiyong democracy lima ka nung pa ama kijai tashi amshirtem alitsü metemsü, ta metetdaktsü.
November 8 nü Centre-i sen 500 aser 1,000 notes anentsütsü lemtetba anema tanü Kolkata nung lokti senden ka nung jembidang Mamata-i, “Ni ajak dang mepishir, langka nangzükang- ni süang mesüra liang, saka Modi yimtenren nungi agientsü. Modi, na ama kijai tashi amshirtem atema tesem mali. (Kechiyong) Ibai democracy linük ka lir,” ta ashi.
“Sentong junga asameyangba sülen ang telemtetba ka agitsüla, aji mesüra ibaji nüburtem atema timtem asütsü. Nai iba telemtetba agiba ajanga nisung 80 dak tema soseta süogo. Bank mesüra nüburtem ket nung sen mali. Aluyimertem aser aayangertem chiyungtsü mali. Tilateri shishilembartem jepdar,” ta lai ashi.
“India tensa tamajung ka nung lir, aser Modi-i mejanger o tululu jembir. Pai ‘Mann ki Baat’ (radio sentong) ajanga asenok sayutsüngir,” ta lai ashi.
14th century nung Delhi chuba, Mohammed bin Tughlaq den Modi medemdanga Mamata-i, “Iba ya Tughlaqi-i agiba telemtetba ka lir. Hitler-ia iba ama telemtetba magi,” ta ashi.
Banerjee-isa, la Ato kilonser menden nung ali nunga laibo iba ama telemtetba magila, ta ashi. Laisa, “Ni iba ama aibelen ka inyak nungbo ni kü telemtetbaji meyipa agila,” ta shisem.
Sorkar telemtetba anema longkak aiter shia Central agency temi amokmerener, iba nungji osangkaket kiburtema dena lir, ta lai ashi.
Sen mamshiba linük ka akumtsü atema Modi-i jembiba aija Banerjee-i, “Sensakertem kechi koma asütsü. Lenir kati nüburtem oshi jembitsüla. Ajungbena Modi-i pa tsüngremtem madak tsüngrem kümer ama bilemer. Lenmang nung jajatsü mesüra chiyungtsü achitsü atema-a Modi dang temelaba meshitsüsa ka kümogo. Modi-i nisung kwi tepoukdaki yoktsü? Ibaji temela masü. India ya nisung crore 128 aliba lima ka lir,” ta ashi.
Laisa Modi dang, kodaser ner party, BJP-i iba telemtetba jelia metet aser Bihar nung party lenirtemi kechiba jelia ali ali, ta asüngdang.
“Tesem kar nung parnoki (BJP) sentilong aser hon aliogo, aser tangbo Modi-i linük nübur shilem 86 bo black money alirtem ama jembir. Nabo (Modi) temesüng asü?” ta laisa asüngdang.