Kikheto-i Coco trophy lapoktsüogo

Dimapur, October 21 (TYO): Akuhaito nung Coco Area Sports Association-i ayongba, 11buba Coco Area Football Tournament, Nagaland Finance Secretary, Kikheto Y. Sema-i Bodhbarnü lapoktsüogo.
Kikheto-i Coco tesem nung aliba yimtsüng pezü aser Akuhaito jila telungjem nung tashi aittsü asoshi iba asayamung ayongba asoshi sentong ayonger dang pelaba metetdaktsü. Iba den külemi mezüng sentong tenzüktsür asürtem nema tetushi agütsü.
Kikheto-i, iba ama asayamung ajanga tesem nung aliba nüburtem kanga junga metettepa akümba den tangatettep aser tesendaktep tajunga akümer, ta ashi.
“Football match asayadang pusemertemi o tajung aser tamajung ajak ayimoktsüaka asayartemi kecha mangashii goal yoktsü nükjidong nung dang asayar. Ibaji mesüka nüburtemi lokti nung lennirtem anema tajung tamajung aika shiaka mangashi amai toktsür nükjidong atongtsü asoshi tali meranga inyaktsüdaktsüner,” ta paisa ashi.
“Nüburtemi atet-aka lennir kaji lokti ajungtsü meji kanga tashi ita alitsü nüngdaker,” ta pai shisem.
Kikheto-i, gaon boratem aser arogo nung lennirtemji Tsüngremi shimtetba nubürtem lir anungji parnok akhümtsübutsü tim, ta ashi.
Sentong lapokba mapang pai, tesem nung aliba gaon boratem nem akhümtsübu agütsüba temaitsü sümerem sü lema agütsü.
Additional Director of Veterinary & Animal Husbandry, Dr. IP Khala aser Dr (Major) Mughavi Sema natia tesem nung lennirtem aser asayartem nem Laishiba ka ka agütsü.
Iba sentong nung tesem nung aliba gaon boratem, lokti lennirtem aser Atoizu Area Sports Association nung ketdangputem dena liasü.
Tongti tesemdanger Kiketo-i reprangba mezüng asaya nung Akuhaito Sports Association-i 2-1 agi Rotomi Sports Association madak takok angu.