Kilem nungi azü tsükdaktsür MBBS kaketshir ana anentsü

Chennai, July 06 (Agencies): Chennai nung aliba nija medical college ka nungi kaketshir anati kilem kolak nungi azü ka tsükdaktsüba atema tanep apu saka bail nung chiok. Iba sülen college ketdangsertemi MBBS kaketshir anaji college nungi anentsüogo.

Video nungji MBBS final year kaketshir, Gowtham Sudarshan-i kilem nungi azüji tsükdaktsür aser pa tembar, Ashish Pal-i iba video ji tangok. Iba video ji social media nung prokshiba sülen nisung aikati iba tatalokbaji aitsüdar.

Tang azüji veterinary hospital ka nung teyari tagitak lir.

Osangbenertem den jembidang Kundrathur Police Inspector, Ruban-i “Onoki tanü Gowtham Sudarshan aser Ashish Pal na apuba sülen Sriperumbudur Judicial Magistrate court matsüngdangi anir ao. Court-i tena nem bail agütsüogo,” ta ashi.

Iba video ji social media nung anguba sülen shiruru temeten atema inyaker, Antony Clement Rubin aser Jennifer Jacob nati police nem ken o ka agütsü.

Kaketshir ana anema IPC Sections 428 aser 429 den Prevention of Cruelty to Animals Act (Sec 11(1-A) kübok ken o benokogo.

Police ketdangserisa, “Azüji tejaklen aser tesülen tetsüng naprong teret kosük. Tang teyari tagitak lir,” ta ashi.

Azüji sayatenya agi kümzük aser azü nemji Bhadrakali tsüngrem tenüng jaloka ‘Bhadra’ tenüng jatsüogo, ta paisa ashi.