Kilir ayuba sobaliba

Akhi tsürabur mapang kanga takar ki kar nung alar aser kilir ayuba daka alaka shinga kidanga alar ayutsübajibo yutsür kilir-a mayu. Tatsüba agi, kilir ayutsübaji asenok sobalibadak mali asü. Ki mapa aser alu mapa ajak nung kidang kinugertem yaritepa inyak, anungji kilir ayutsüa nüngdak madok. Aji oda, akhidangbo kibong teimbaka nübener kibong liasü, anungji tantsülai mesüra tambusangi tenu nungertem ajak pongtet. Kidang tanur repranger balaka malinungji, tsüraburi kinü tanur dena alu nung bener oa külemi mama yongdakja among. Ano, asenok sobaliba tajung kaji, alui bener mao yimtak kinü tanurtem yutsür aortemji kidang monger chitentsürtemi pei chir den lemsatepa tangar kiyonger aser kinunger chirtem nemjia mama yongdakja anepalu. Iba amaji lia, Nagaland state kümer külen tesem ajaklen school lapokyonga ao aser kidang tasor temang school azüngtsü ajungshitepa kaketshisatsü angazüktsü tenzük. Iba tashi nunga tsüraburtemi kidang tangar nisung bener arua kilir ayutsübaji tebilema mebilem, anungji timtem arema kidang tanurtem ajak tsüraburtemi dang anepalu. Tanurtema anüngdang khen kaketreju nung alidang ashi, anepdang yakta saaka tzüdai orr külenang chiyong aser school senshir tsük asentsü mesüra süngbeni aotsü ta tanen maka mapa inyaka tsüraburtem yari. Item tanurtemji aika tanü yimten, arogo aser lokti nung tongtibang nisung kümogo. Item tongtibang nisung aser parnok chirnurtemji asenok lir aser tanübo taaktsüka asenoki asen kidang kilir melii melitetter. Atangji, putu balala, anungji tanübo kibong aika nung teyaritepertem nüngdaker. Ajisüaka tesasatsükaji, kidang kilir ayuba ya asenok asoshi sobaliba amai ka kümogo. Karibo kidang kilir ayubaji jenjang kanga tuluka atongba agi ayu amai bilema asükümer aser joko kidang arur nem tzü agütsütsüa aaker. Aji oda, kidang kilir ayuba jagi chuba aser chubatsür amai bilemer. Anungji, kidang chirnurtem aika liaka, shinga nema kia mokdaktsütsü aser soruchiokdaktsütsübajibo pongmang. Kidang kilir lirji süngo yanglutsübaji kilir mapa aser chiyongerbo shingaia ausoa meshidoktsü. Iba amaji kibong aika nung tanurtemi süngo yanglua mashi tain akümer. Tanü lanurtem kibong kümer junga azüa soruchioka mechiyongtet tatsüka lidanger balartemji item tanurtemji lir. Item takoksatemji dang masü saka tanü asenok kibong aika nung kilirbo nisung masü amato amshiba otsü aika jembir. Tawa Kohima nunga kibong ka nung kilir asütsü atema tetsür chanu ka anir aru ayuba dak ki kiburi tenük ajak waka kanga mejungi azükba otsü asenoki angashiogo aser noksaa aikati ngur alitsü. Ano, asenok kibong aika nung school züngdakja ki mapa inyakdaktsütsü asosho tangar chir anir arua lidaktsür. Ajisüaka, asenok aikati meima mamshir aser lesson bushitsü mapanga magütsür. Ano, kibong kar nungbo kilirtem asoshibo jang balaka (tamajung) alia chia balaka sorua chiyongdaktsüba otsüa lir. Atangji, kibong kasa masünungji, kibong karbo tanur sodena yur tebok mesüngdaktsütet kanga timtemba purtem aika lir. Item kibongtem nung jagi tanurtem tangar kidang kilitsü yoker. Asenoki metettsüba kaji, kilitsü yokbaji alar asütsü yokba masü. Kilir tetezü tenzüker, anungji asenok tenzüktsü asoshi aruba nisungji asenoki asen tanur ama meima amshitsüla. Temeim agi kilirji anepaluba ajanga temulung lemtetlemteta kümdaktsür pa mesüra lajiang, Yosef ama, asen kidang kibur kümdaktsütsüla. Tanü asüngbo kidang kilirtem junga anepalutsü atema government-i tenük kanga zünga repranger aser parnokji bushia telongjem tenzükdaktsür, Aji oda, Nagaland nunga Nagaland Domestic Workers’ Union tenteta lir. Atangji, iba telongjem nungji asenok kidang alir kilirtem ajakbo züngsema malitsüa akok, saka telongjem tenzükba tetezüji parnoka temeten kar lir. Item temeten rongnung parnok nem taa shitak agütsütsüla aser anogo nung ghonda ti dak tali mapa meinyakdaktsütsüla ta asüba temetentem lir. Kidang kilir ayuyonga, kidang tanurtemi yaritepa ki aoktsüla, soruchioktsüla aser süoshi shidoktsüla aser kilirji kidang asen yariteper tongtibang nisung ta bilema pa mesüra laji mezüngmeshi masütsüla. Ashi, akok nungbo asenokbo kidang kilir mayuang tajungba !