Kim-i S Korea den tongpang raratsü renemshitsü ozüng agütsür

South Korea kübok Seoul yimti nung S Korea nüburtemi N Korea lenisang, Kim Jung-Un kürakyanglu ka aser N Korea linük wako rongdoka N Korea anema tanü Hokolbar nü longkak aitba noksa nung angur. (Seoul, August 21)

Seoul, August 21 (Agencies): North Korea lenisang, Kim Jong-Un-i South Korea den tongpang raratsü renemshitsü ozüng ka tanü Hokolbar nü agütsüogo.

North aser South Korea mitkar nati par linük ana tsüngda tentetba arrtsü adena prangpong injang tesashi yashi Brehostibar nü yoktepba sülen par linük ana tsüngda tang tensa kanga mejungi akümba osang bushiteta lir.

Ano, Seoul-i ola tuluba kümdaktsüba osettsüset amshia olulu osangtem yimjak nung aser arrtsü adena sangdongba maparen ghonda 48 tashi nung anentsü asoshi N Korea mitkartemi yashi metetdakja lir.

Yamaji meinyakra, parnoki mitkar tashi amshia iba maparenji anentsütsü asoshi N Korea mitkartemi amokmerenogo aser ibaji ajanga S Korea nung mitkartemi tensa mashika ajurua kasaji azüoktsü asoshi terenemshiba tulu agitsü tenzüka lir.

Aji oda, par mitkar ana tsüngda injang yoktepba sülen Kim-i anir par Central Military Commission (CMC)-i rongdak senden ka yashi nikongtsütsü amenba sülen Seoul-i tuyuba ama meinyakra, kasaji anentsütsü asoshi mitkar tashi amshitsü aser nungdak dang adokra, S Korea miktartem den tongpanga raratsü telemtetba ka CMC-i agi aser Kim-i tanü tongpang raratsü renemshitsü ozüngji agütsü.

“Tanü nikongtsütsü 5:00 ako nungi tenzüka arrtsülen alir mitkar aser Korean People’s Army (KPA) nung densemba mitkar telok ajungai tongpang raratsü renema alitsü ozüng par lenisang, Kim-i tanü agütsüogo,” ta sorkari ketdang asüba KCNA news agency-i osang jangjashitsü.

Ano külen, KPA-i teshisadangba kecha mekai lendong bener arutsütsü maparen meinyaktsü tajungshiba olen ka S Korea’er mitkar lenirtemia tanü metetdaktsüogo.

Parnoki ajungshiba ama meinyakra, par S Korea mitkartemia N Korea nem tapet telangzüba agütsütsü renemba olen ka parnokisa sangdonga liasü.

Par linük ana tsüngda 1950-53 mapang raraba Korean War yimjung tezüngzüktep agiba ajanga masü saka meraratsü nangzüktepba ajanga anenba yong N Korea o S Korea na tsüngda küm 65 tejaklen nungi tenzüka tanü tashi tensa kanga mejungi lir.