Kim Jong Un-i Pope Francis North Korea-i arudaktsünür: South Korea

Seoul, Mongputeni/Oct. 09 (Agencies): North Korea lennir Kim Jong Un-i Pope Francis ya North Korea-i arua semdangdaktsünür aser iba osang ya Vatican nem agütsütsü, ta South Korea-i Sangtennü ashi. Mongputeni/October 17-18, 2018 anogotem nung South Korea Tir Moon Jae-in-i Vatican semdangba mapang Pope den ajuruteptsü.
“Pa Pope Francis den senden amenba mapang pai (Moon) mendenpuba Kim Jong Un nungi yokba osang sangokja pope-i Pyongyang semdangba pelashishia agizüktsü ta ashitsü,” ta Moon indang odongtar, Kim Eui-kyeom-i osangbener den jembidang metetdaktsü.
Moon ya Mongputeni 13 nungi 21, 2018 tashi Europe linüktem sema jajatsü sentong lir aser iba mapang pai France, Italy, Denmark aser Vatican nung anenzüktsü. Rara anemer Moon-i Kim den tesendaktep tajungba yanglushia asemben tashi ajurua lir.
Tesüsa Moon-i taoba ita Pyongyang semdanga Kim ajuruba mapang pa meina South Korea nunger Archbishop Hyginus Kim Hee-joong ao. Archbishop den sensaksemba mapang Kim-i yimjung aginüba indang Vatican nem metetdaktsütsü ajungshi, ta Moon indang odongtari ashi.
Ajaki senzüka yutsüba, sensaker saka nuclear nok-o-nü bena aliba North Korea lenniri taküm küm tetenzüklen nungi tangatettep kati arutsü merangba yimya ajitetdakja Aami/June nunga US Tir Donald Trump dena senden mena liasü.
Taoba ita senden amenba mapang Kim-isa tzümeketli nung mitkartem tebilemtsü ajemdaktsütsü merangtsü maneni ashi saka aikati tsübua aliba atomic osettem raksatsü atemabo kecha meshisem.
Tamangba yimsü temeden ya North Korea indnag linük temzüng nunga inoka lir, saka tamangba yimsü ajunga indang inyaksangshi nokdanga lir.
Century 20buba tetenzüklen Korea linük mesadangi alidang Pyongyang ya missionary tem asoshi tongtibang tesem ka liasü, kong tekülem ki aika yanglua Khristanpur jenti alibayong ‘Jerusalem of the East’ ta nüngja agüja liasü.
Saka asür Kim Il Sung (Kim Jung Un tebuo)-i Khristan yimsü ya tetsükdaktsü ka ta ajiteta ajunga samatsütsü meranga tamanger aika labour camp nung puoka ayu.
Iba sülen North Korea yimli ajanga Catholic lokti tentet dang teyari agütsüba project tem tenzüktsü mela, saka Vatican den tesendaktep tejangjabo meliasü.
2014 küm Pope Francis-i South Korea semdangba mapang Korea linük ana longjemtsü asoshi Seoul nung bendanga agüja sarasadem.
2014 küm Korea Gallup ajanga survey ka agiba nung South Korea nunger shilem 22 Buddhist aser shilem 30 jungnüa Khristan liasü.