Kim Jong-un-i US aircraft carrier samatsütsü amokmeren

Seoul, May, 01 (Agencies) : North Korea nunger lenir Kim Jong-un-i, America navy indang tzü telung nung jajaba rong, USS Michigan, North Korea tzüleni arura samatsütsü, ta amokmerenogo.
Nuclear tashi keta aliba tzü telung nung jajaba rong, USS Michigan ji tang South Korea kübok Busan yimti nung aliba navy tesep nung anena lia USS Carl Vinson aircraft carrier teloka arua densemogo, ta osangkakettem nung shia lir.
Pyongyang-i, USS Michigan ji tera danga arakzütsü merang nungbo, tzü telung nung lua tanela ka mesüka akümtsü, ta sangdongogo.
“Korea peninsula nung ajungbena nuclear rong anenbaji ‘super aircraft carrier strike’ yokba mapa den tenchiteper aser ano military temi maneni onok nem tebilemtsü agütsür,” ta North Korea website ajanga metetdaktsü.
Pyongyang-isa, USS Carl Vinson-a North Korea anasa tera danga arura tzü telungi ludaktsütsü. ta shiogo.
“Nuclear aircraft carrier mesüra tzü telung nung jajaba nuclear rong süaka itemji ozü military tashi ajanga nuclear nokdangba inyakyim agi merang tejep ka dang kümdaktsütsü,” ta kasa website ajanga ashi.
North Korea aser US na tsüngda tesendaktep mejungi akümba sülen iba ama tashi toktepba mapa inyakteper. Hokolbarnü missile tendangba nung tamakok anguba sülen ano Kim Jong-un-i missile ka danga tendang nungbo odang medoktsütsü, ta US Tir Donald Trump-i shia liasü.
Trump-i pa military inyakyim aser tasa kanga miimshia ayur, ajisüaka pai, ni aniba administration-i Kim tashi mait kümdaktsütsü, ta ashi.
“Iba mapa ya Clinton, Bush aser Obama nunger mapang inyakatoker alitsüla,” ta pai ashi.
Pyongyang-i missile aser nuclear tendangba anendaktsütsü asoshi China Tir, Xi Jinping dak temulung kanga lema aliba mapang North Korea-i ano ballistic missile ka tendangtsü merangbaji China mezüngmeshiba mapa lir, ta US Tir-i ashi.
North Korea dang tashi sayua US-i Korea peninsula tzüleni USS Carl Vinson yok aser iba rongji Honibarnü Nagasaki, Japan ajanga North Korea leni aoba nguogo.